Rýma nágrenni sprenginganna vegna mengunar

Yfirvöld í Kína hafa skipað íbúum hafnarborgarinnar Tianjin að rýma svæðið þar sem gríðarlega stórar sprengingar urðu á miðvikudaginn. Um er að ræða svæði með þriggja kílómetra radíus og var gripið til þessa ráðs vegna gruns um blásýrumengun í andrúmsloftinu.

Samkvæmt BBC hefur nú verið staðfest að 85 létu lífið í sprengingunum. Rúmlega 720 manns slösuðust og þar af 25 sem eru í alvarlegu ástandi.

Fjölmiðillinn Xinhua sagði frá því í morgun að manni hefði verið bjargað úr rústunum í um 50 metra fjarlægð frá miðju sprenginganna. Sá gat talað við björgunarmenn þegar hann fannst og er hann nú á sjúkrahúsi.

Enn loga eldar í borginni og í morgun blossaði upp nýr eldur sem eyðilagði fleiri bíla við höfnina. Þúsundir nýrra bíla sem biðu flutnings eyðilögðust í upprunalegu sprengingunum.

Fjölda fólks er enn saknað. Tugir ættingja sem bíða svara reyndu að stöðva blaðamannafund í morgun og fóru fram á að fá upplýsingar um ættingja sína. „Við höfum farið og leitað á öllum sjúkrahúsum borgarinnar og höfum ekki fundið þau,“ segir Wang Baoxia við Reuters fréttaveituna. Hann leitar bróður síns.

„Það hefur enginn embættismaður viljað ræða við okkur. Ekki einn.“