Wenger: Fórnaði alltaf bikarnum

Arsenal heimsækir Manchester United í kvöld í átta liða úrslitum enska bikarsins í fótbolta, en Arsenal er ríkjandi bikarmeistari eftir sigur á Hull á Wembley í fyrra.

Liðið sem tapar þessum leik vinnur líklega engan titil á tímabilinu, en þau eru ekki nálægt toppbaráttunni í deildinni og þá er Arsenal í vondum málum í Meistaradeildinni.

Sjá einnig: Wenger aldrei unnið van Gaal

„Þetta er stór leikur og mikilvægur fyrir bæði lið. Hann mun hafa áhrif á trúna í báðum liðum upp á framhaldið í deildinni,“ segir Arsene Wenger, knattspyrnustjóri Arsenal.

„Það er mikill karakter í mínu liði. Við byrjuðum leiktíðina ekki nógu vel en maður sá alltaf hvað það kom við menn að tapa stórleikjum.“

„Andlegt ástand leikmanna er gott og þeir verða klárir í slaginn á mánudagskvöldið.“

Wenger viðurkennir að hafa ekki sett fullan kraft í enska bikarinn á undanförnum árum því hann hafi verið að reyna komast lengra í Meistaradeildinni.

„Bikarinn var alltaf spilaður á vondum tíma, of nálægt Meistaradeildinni. Því þurfti maður að taka erfiðar ákvarðanir,“ segir Frakkinn.

„Hverju átti maður að fórna ef maður var með tæpan leikmann? Alltaf fórnaði ég bikarnum á endanum.“

„Stundum fórnaði ég ekki bikarnum og við fengum það í andlitið með meiðslum lykilmanna tveimur til þremur dögum fyrir mikilvægan leik,“ segir Arsene Wenger.

Viðureign Manchester United og Arsenal verður í beinni útsendingu á Stöð 2 Sport í kvöld.