Engar nýjar vísbendingar varðandi strokufangana

Engar nýjar vísbendingar hafa borist um strokufangana tvo sem flúðu úr hámarksöryggisfangelsi í New York. Hundruð lögreglumanna taka þátt í leitinni, en fangarnir David Sweat og Richerd Matt flúðu fyrir átta dögum síðan.

Þeir notuðu rafmagnsverkfæri til að komast út úr klefum sínum og þaðan fóru þeir í gegnum rör út í holræsakerfi við fangelsið. Þeir höfðu sett brúður undir rúm sín, sem plötuðu verði fangelsisins.

Samkvæmt AP fréttaveitunni eru íbúar nærri fangelsinu óttaslegnir. Þau óttast að þeir haldi til á svæðinu og gætu farið inn á heimili þeirra. Starfsmaður fangelsisins er nú í haldi lögreglu eftir að hafa orðið þeim út um verkfæri. Hún átti einnig að aka þeim frá fangelsinu en mætti ekki svo þeir þurftu að flýja á tveimur jafnfljótum. Joyce Mitchell neitar þó að hafa hjálpað þeim.

Að mestu fer leitin fram á skógi vöxnu svæði í kringum fangelsið, en um tíma var talið að þeir væru mögulega komnir til Vermont eða jafnvel til Kanada. Lögreglan segir að leitinni verði ekki hætt fyrr en mennirnir finnast.