Scholes gagnrýnir ömurlegan fótbolta United: Þora ekki að taka áhættu

Paul Scholes, fyrrverandi miðjumaður Manchester United og einn sá besti sem spilað hefur í ensku úrvalsdeildinni, á erfitt með að horfa á sitt gamla lið spila þessa dagana.

Hann gagnrýnir liðið harkalega í pistli sínum í enska blaðinu Independent, en þrátt fyrir að vera í þriðja sæti hefur United-liðið verið lastað fyrir leiðinlegan fótbolta að undanförnu.

Sjá einnig:Van Gaal: Leiðinlegt að heyra baulið því við spilum fyrir fólkið

Sam Allardyce, knattspyrnustjóri West Ham, kallaði liðið „Longball United“ eftir 1-1 jafntefli liðanna og þá bauluðu stuðningsmenn Man. Utd á sína menn í 3-1 sigri gegn Burnley á miðvikudaginn.

„Það veitir mér enga ánægju að segja að ég á erfitt með að horfa á liðið hans Van Gaal þessa dagana. Það vann Burnley á miðvikudaginn en Burnley var mun betra liðið í fyrri hálfleik. Stundum er fótboltinn sem United spilar ömurlegur,“ segir Scholes.

„Til að vinna leiki þarftu að sækja og þegar þú sækir þarftu að taka áhættur. Of fáir leikmenn í liðinu núna eru tilbúnir til að taka þessar áhættur.“

Sjá einnig:Sjáðu öll 25 mörkin úr 25. umferð enska boltans á 25 mínútum

„Sem miðjumaður hjá United átti ég að gefa boltann fram á við og ég veit að það heppnaðist ekkert alltaf. Ég þurfti ekki alltaf að afhenda framherjunum mörk á silfurfati. Þeir þurftu sjálfir að komast á boltann og skora mörk.“

„Var þetta auðvelt? Nei, en við vorum að spila fyrir Manchester United. Það á ekki að vera auðvelt,“ segir Scholes sem vann 20 stóra titla á löngum og farsælum ferli á Old Trafford.

Hann segir Ángel di María hafa tekið fleiri áhættur en nokkur annar í liðinu en því miður hafi það ekki alltaf gengið upp. Argentínumaðurinn missir boltann alltof oft miðað við hverju hann skilar fram á við.

„Það virðist allt snúast um að halda boltanum. Ég myndi eiginlega ganga lengra en það og segja að það sé árátta hjá liðinu að halda boltanum þessa dagana,“ segir Scholes sem skilur ekki hvers vegna Rooney er notaður sem miðjumaður.

Sjá einnig:Svara sex spurningum um Man. Utd: Di María slakur og Van Persie orkulaus

„Van Persie og Falcao virka eins og ókunnugir á meðan Rooney er endalaust færður til að vellinum svo þeir geti spilað saman.“

„Wayne getur spilað hvar sem er á vellinum og gefið þér frammistöðu upp á sjö af tíu. En ef Van Gaal finnst Rooney ekki betri kostur í framlínuna en hinir tveir er það mikið vandamál,“ segir Paul Scholes.