Svara sex spurningum um Man. Utd: Di María slakur og Van Persie orkulaus

Manchester United er lið sem hefur gefið næst flestar langar sendingar fram völlinn á tímabilinu, en spilamennska þess hefur verið gagnrýnd harkalega að undanförnu.

Þrátt fyrir að liðið hafi aðeins tapað einum leik af síðustu fjórtán eru sérfræðingarnir óánægðir með spilamennsku þess.

Sjá einnig:Manchester United náði stigi á Boleyn Ground | Sjáið mörkin

Í viðtali við Daily Mail svara Jamie Redknapp, fyrrverandi leikmaður Liverpool og sparkspekingur Sky Sports, og Martin Keown, fyrrverandi leikmaður Arsenal og sparkspekingur BBC, nokkrum spurningum varðandi Man. Utd.

1. Af hverju er svona leiðinlegt að horfa á Manchester United?

JR: „Þegar maður spilaði við Man. Utd þegar það var upp á sitt besta undir stjórn Alex Ferguson var svo mikil hreyfing í spilinu. Nú er þetta allt miklu erfiðara og meiri strúktúr. Fótbolti snýst stundum um að taka áhættur.“

MK: „Þeir spila ekki nógu hratt. Þegar þeir fá boltann á miðjunni eru þeir ekki með nógu mikið sjálfstraust til að spila fram á við og þar skorti þá líka hraða. Það var alltaf ákveðin ára yfir United en nú er geislabaugurinn að hverfa.“

2. Er verið að nota Wayne Rooney rétt?

MK: „Til styttri tíma litið, já, en ekki til lengri tíma. Van Gaal er að reyna að finna út úr þessu til lengri tíma litið. Rooney verður miðjumaður í framtíðinni en það koma stundir þar sem hann verður að spila frammi.“

JR: „Ég væri hæstánægður ef ég ætti að spila á móti Rooney á miðjunni. Þar gerir hann mótherjanum minnsta skaðann. Sem varnarmaður vill maður hafa hann eins langt frá markinu og hægt er.“

3. Er hægt að bjarga ferli Falcao hjá United?

JR: „Það held ég ekki og það er synd.“

MK: „Falcao getur sagt að hann er ekki að fá nóg af boltum inn í teiginn. Hann vill spila af varnarmanninum, komast fyrir framan þá og ná sér í mörk á nærstönginni.“

4. Getur Van Gaal lífgað Di María og Van Persie við?

MK: „Di María verður að fara að gera það sem hann gerði þegar hann kom fyrst til United;  að hlaupa með boltann sér til skemmtunnar. Kannski er kominn tími á að Van Persie spili aftar. Það er eins og hann sé orkulaus þessa dagana.“

JR: „Mér fannst Di María vera að tæta deildina í sig þegar hann kom en ekki lengur. Hann hefur verið mjög slakur, sérstaklega miðað við Sánchez hjá Arsenal. Van Persie hefur aldrei náð sér eftir að Ferguson hætti.“

5. Hver hafa verið stærstu mistök Van Gaal?

JR: „Að tækla ekki vandræðin í vörninni. David De Gea er búinn að bjarga þeim margsinnis. United lítur alltaf út fyrir að vera hrætt við að fara fram því þeir eru svo veikir í vörninni.“

MK: „Að reyna að spila Falcao og Van Persie saman. Þeir geta ekki spilað saman. Hann verður að velja annan hvorn og spila Rooney með honum frammi.“

6. Endar Man. Utd á meðal efstu fjögurra liðanna?

MK: „Það er ekki sjálfgefið. Tottenham, Liverpool og Southampton eru öll í baráttunni og Van Gaal veit hversu sterkur hópurinn er hjá Arsenal.“

JR: „Ég ætti að segja hátt og snjallt já því United er ekki í Evrópu en ég er ekki svo viss. Kannski bjargar það sér á lokastundu. En þetta lið hefði átt að berjast um titilinn.“