Leikmenn City miskunnarlausir á heimavelli

Eins og lömb leidd til slátrunar er líklega orðatiltæki sem á við flesta andstæðinga Manchester City á heimavelli þeirra, Etihad-leikvanginum, í ensku úrvalsdeildinni undanfarin þrjú ár.

Liðið hefur hreinlega valtað yfir flesta andstæðinga sína á þessum þremur árum sem hefur skilað sér í tveimur meistaratitlum. „Sláturhúsið“ er vissulega réttnefni yfir Etihad-leikvanginn.

Miskunnarleysi leikmanna liðsins er algjört og þeir virðast aldrei hafa áhuga á því að stíga á bremsuna. Bensíngjöfin er stigin í botn allan tímann og aldrei hætt.

Leikmenn Norwich fengu sjö mörk á sig, Tottenham fékk sex mörk á sig og Fulham og Aston Villa fengu fimm mörk á sig. Arsenal fékk einnig sex mörk á sig í fyrra á Etihad-leikvanginum.

Liðið hefur skorað 2,79 mörk að meðaltali í leik í 57 heimaleikjum undanfarin þrjú ár og aðeins fengið á sig 0,7 mörk á sama tíma.

Þrjú lið, Chelsea, Manchester United og Norwich, hafa farið með þrjú stig þaðan en nær öll önnur lið hafa skakklappast með skottið á milli lappanna úr „Sláturhúsinu“.

Tólf síðna sérblað um ensku úrvalsdeildina fylgir helgarblaði Fréttablaðsins á morgun. Í blaðinu er meðal annars rætt við Gylfa Þór Sigurðsson, leikmann Swansea, Grétar Rafn Steinsson fjallar um fyrrverandi læriföður sinn, Louis van Gaal, og fjallað er um sóknarlínu Liverpool eftir brotthvarf Luis Suárez svo fátt eitt sé nefnt.  Ekki missa af því.   

Stöð 2 Sport 2 sýnir 380 beinar útsendingar frá Enska boltanum á komandi tímabili. Net og heimasími fylgir með Enska pakkanum. Fáðu þér áskrift á 365.is