Hver er hann þessi Alexis Sanchez?

Annað sumarið í röð dustaði Arsene Wenger, knattspyrnustjóri Arsenal, rykið af lítið notuðu veski sínu og fjárfesti í stórstjörnu fyrir fúlgu fjár.

Í fyrra var það Þjóðverjinn Mesut Özil en nú var það Síle-maðurinn Alexis Sanchez sem var keyptur fyrir sex milljarða.

Stuðningsmenn Arsenal og aðrir aðdáendur enska boltans fengu forsmekk af getu piltsins í leiknum gegn Manchester City um Samfélagsskjöldinn á sunnudaginn. Sanchez var gríðarlega ógnandi þær 45 mínútur sem hann spilaði og átti sinn þátt í öruggum sigri Arsenal.

Ljóst er að þar er maður á ferð sem getur unnið leiki upp á eigin spýtur og fært Arsenal nær hinu endanlega takmarki, sem er að vinna deildina í fyrsta sinn síðan 2004.

„Frammistaða Sanchez á undanförnum tímabilum hefur stöðugt verið í hæsta gæðaflokki og við hlökkum til að fá hann í liðið,“ sagði Wenger þegar tilkynnt var um kaupin á Síle-manninum.

Og það er kannski ekki furða að Wenger sé glaður. Sanchez skoraði 19 mörk á síðasta tímabili fyrir Barcelona, flest í fjarveru Lionels Messi. Hann lék sér að enska landsliðinu á Wembley í nóvember á síðasta ári þegar hann skoraði bæði mörkin í 2-0 sigri.

Og þessi 25 ára leikmaður, sem á að baki leiki með Colo-Colo í Síle, Rive Plate í Argentínu og Udinese á Ítalíu þar sem hann sló fyrst í gegn, er ekki bara hæfileikaríkur með boltann.

„Hann getur spilað allar þrjár sóknarstöðurnar á vellinum, er gríðarlega duglegur í vörn, beinskeyttur og vandaður drengur,“ sagði Pep Guardiola, sem keypti hann til Barcelona árið 2011.

Af þessu má sjá að Arsenal hefur fengið toppleikmann, ekki bara í sóknina heldur líka í vörnina.

Alexis Sanchez...

...er 25 ára gamall

...er frá Chile

...er 1,69 metrar á hæð

...skoraði 19 mörk á síðasta tímabili fyrir Barcelona

....hefur spilað 71 landsleik fyrir Chile og skorað 24 mörk

...hefur verið keyptur fyrir samtals 12 milljarða á ferlinum

Tólf síðna sérblað um ensku úrvalsdeildina fylgir helgarblaði Fréttablaðsins á morgun. Í blaðinu er meðal annars rætt við Gylfa Þór Sigurðsson, leikmann Swansea, Grétar Rafn Steinsson fjallar um fyrrverandi læriföður sinn, Louis van Gaal, og fjallað er um sóknarlínu Liverpool eftir brotthvarf Luis Suárez svo fátt eitt sé nefnt.  Ekki missa af því.   

Stöð 2 Sport 2 sýnir 380 beinar útsendingar frá Enska boltanum á komandi tímabili. Net og heimasími fylgir með Enska pakkanum. Fáðu þér áskrift á 365.is.