Silfurhafi um við­brögð Trumps: „Ekki gaman að vera hluti af þessu“

Ogden, sem aðeins var sigraður af hinum magnaða Johannes Høsflot Klæbo, er líkt og liðsfélagar sínir í bandaríska skíðalandsliðinu á ferðalagi allt tímabilið en honum líkar ekki það sem hann sér frá heimalandinu undir forystu Donalds Trumps forseta.

Innan bandaríska ólympíuhópsins náði ástandið hámarki fyrr í vikunni.

Skíðafimimaðurinn Hunter Hess er, líkt og alpagreinastjarnan Mikaela Shiffrin, meðal þeirra sem hafa tjáð sig opinberlega um áhyggjur sínar af því að keppa fyrir hönd Bandaríkjanna undir stjórn Trumps.

Hess hefur sagt að það að keppa fyrir hönd Bandaríkjanna við núverandi aðstæður sé „orðið erfitt“. Það kallaði á hörð viðbrögð frá Trump, sem notaði Truth Social-reikning sinn til að lýsa Hess sem „algerum lúser“.

Á þriðjudag var Ogden spurður hvað honum fyndist um viðbrögð Trumps og það pólitíska andrúmsloft sem ríkir í heimalandi hans.

„Ég hef ekki verið heima í Bandaríkjunum í langan tíma en það er virkilega erfitt að fylgjast með því sem er að gerast úr fjarlægð. Ég vil gjarnan trúa því að ég komi frá þjóð þar sem þú getur sagt það sem þú vilt án þess að forsetinn elti þig. En augljóslega ekki,“ sagði Ben Ogden.

„Mér fannst það sem Hunter sagði vera alveg í lagi. Það var ekki eldfimt og skapaði engin stór vandamál. En, þú veist, þetta er ekkert sem er gaman að vera hluti af,“ sagði Ogden.

Ogden fór heiðurshring með bandaríska fánann eftir að silfrið var tryggt og segir að hann fái innblástur frá heimalandi sínu þrátt fyrir allt.

Hann stóð líka við loforð við sjálfan sig. „Ég lofaði fimmtán ára sjálfum mér að ef ég ynni til verðlauna á Ólympíuleikum myndi ég taka heljarstökk aftur á bak af verðlaunapallinum,“ sagði Ogden.

Ogden varð fyrsti bandaríski karlmaðurinn til að vinna til verðlauna í skíðagöngu á Ólympíuleikum síðan Bill Koch gerði það árið 1976.