Gylfi hættulegastur á fyrstu 50 mínútunum

Gylfi Þór Sigurðsson er búinn að gefa sjö stoðsendingar í fyrstu tíu umferðum ensku úrvalsdeildarinnar og er í öðru sæti á eftir Chelsea-manninum Cesc Fàbregas sem hefur lagt upp níu mörk félaga sinna.

Á heimasíðu ensku úrvalsdeildarinnar má sjá sundurgreiningu á þessum stoðsendingum Gylfa og þar er athyglisvert að sex af sjö stoðsendingum hans hafa komið á fyrstu 50 mínútum leikjanna.

Eina stoðsendingin sem sker sig úr er stoðsending Gylfa á Nathan Dyer í 3-0 sigrinum á West Bromwich Albion en sú kom ekki fyrr en á 71. mínútu leiksins.

Það er einnig fróðlegt að sjá það að allar sjö stoðsendingar Gylfa hafa komið frá miðjum vellinum en ekki út á kanti. Hann hefur lagt upp 3 mörk fyrir Nathan Dyer, gefið tvær stoðsendingar á Wilfried Bony og eina á þá Sung-Yong Ki og Wayne Routledge.

Stoðsendingar Gylfa í ensku úrvalsdeildinni 2014-15 eftir leiktíma:

1. til 10. mínúta    1

11. til 20. mínúta    1

21. til 30. mínúta    2

31. til 40. mínúta    1

41. til 50. mínúta    1

51. til 60. mínúta    0

61. til 70. mínúta    0

71. til 80. mínúta    1

81. til 90. mínúta    0