Treyjan sem Gylfi spilaði í gegn Hollandi í Hagaskóla

Nemendur og starfsfólk Hagaskóla standa fyrir góðgerðardeginum í sjötta sinn á morgun, miðvikudag. Markmiðið er að safna peningum fyrir krabbameinsdeild Landspítalans og neyðaraðstoð við börn á Gasa svæðinu. Verkefnið kallast Gott mál, eða unglingar fyrir unglinga.

Þetta er í fyrsta skipti sem góðgerðardagurinn er haldinn að hausti. Opið hús verður í skólanum milli klukkan 16 og 19 þar sem nemendur og starfsfólk taka á móti gestum. Líkt og undanfarin ár verður fjölbreytt dagskrá og eru sem flestir hvattir til að mæta. Síðustu vikur hafa krakkarnir í skólanum unnið hörðum höndum að undirbúningi dagsins og verða uppákomurnar á ótal margar að því er segir í tilkynningu.

Nefna má að landsliðstreyjan sem Gylfi Þór Sigurðsson klæddist í sigurleiknum gegn Hollandi fyrr í mánuðinum verður boðin upp. Gylfi Þór skoraði bæði mörk Íslands í 2-0 sigri eins og frægt er orðið. Treyjan er árituð af Hafnfirðingnum.