Dómarinn sem missti af bitinu hjá Suárez dæmir á morgun

Mexíkóski dómarinn MarcoRodríguez fær þann heiður og vandasama verkefni að dæma undanúrslitaleik Brasilíu og Þýskalands á HM 2014 í fótbolta annað kvöld.

Þetta kemur nokkuð á óvart í ljósi þess að Rodríguez hefur aðeins dæmt tvo leiki á mótinu. Þeir voru báðir í riðlakeppninni og hefur hann því ekki flautað einn leik í útsláttarkeppninni til þessa.

Það sem meira er þá er Rodríguez maðurinn sem dæmdi leik Úrúgvæ og Ítalíu í lokaumferð D-riðils og missti af því þegar Luis Suárez beit GiorgioChiellini í öxlina.

Það þykir kannski ósanngjarnt að refsa honum fyrir það atvik, en úthlutunin kemur engu að síður mjög á óvart þar sem hann dæmdi svo umdeildan leik og missti af svona stóru atviki.

Þetta er aðeins ein af nokkrum furðulegum ákvörðunum Massimo Busacca, yfirmanni dómaramála hjá FIFA, á mótinu. Hann er afar umdeildur og hefur línan sem hann, á meðal annarra, setti fyrir mótið verið harkalega gagnrýnd.

Eitt af því sem hann benti dómurum á að gera á mótinu var að halda gulum spjöldum í lágmarki, en sumir leikmenn hafa sloppið ævintýralega og haldist inn á vellinum þegar þeir undir venjulegum kringumstæðum ættu að vera sendir af leikvelli.

Carlos Velasco, Spánverjinn sem dæmdi leik Brasilíu og Kólumbíu, hefur fengið mikla gagnrýni fyrir að leyfa jafnmikla hörku og raun bar vitni í leiknum. Hann var lengi að rífa upp spjöldin og gengu menn á lagið enda geta slagir Suður-Ameríkuþjóða oft verið ansi harðir.

Dómarar eru nú sakaðir um að vernda ekki bestu leikmennina, en JamesRodríguez fékk nokkrar vænar byltur í leiknum og þá er ofurstjarnan Neymar úr leik eftir svakalegt brot sem hann varð fyrir. Enn fremur eru dómararnir á HM eru sagðir stressaðir og hræddir við pressuna frá Busacca.