Aron og félagar eru þeir prúðustu á HM í Brasilíu

Aron Jóhannsson og félagar hans í bandaríska landsliðinu mæta Portúgal í kvöld í öðrum leik liðanna í G-riðli HM í fótbolta í Brasilíu.

Bandaríska landsliðið vann 2-1 sigur á Gana í fyrsta leik og tryggir sér sæti í sextán liða úrslitum keppninnar með sigri í þessum leik sem verður í beinni útsendingu á Stöð 2 Sport 2 klukkan 22.00.

Lærisveinar Jürgen Klinsmann koma inn í leikinn sem prúðasta lið keppninnar til þessa samkvæmt frétt á BBC.

Bandaríska landsliðið fékk aðeins dæmdar á sig tólf aukaspyrnur í fyrsta leiknum og fékk ekki á sig eitt einasta spjald.

Það er aðeins eitt lið í keppninni sem er einnig spjaldalaust en Þjóðverjar hafa ekki fengið spjald í fyrstu tveimur leikjum sínum.

Úrúgvæ er grófasta liðið til þessa en Úrúgvæmenn hafa fengið fjögur gul og eitt beint rautt spjald í fyrstu tveimur leikjum sínum.