Fólkið í Mobile söng nafn Arons á barnum

Það var ekki bara fagnað í Grafarvogi er Aron Jóhannsson spilaði á HM í gær. Fólk í fæðingarbæ hans í Bandaríkjunum fagnaði líka gríðarlega.

Fjöldi fólks var saman kominn á O'Daly's barnum í Mobile í Alabama-fylki í gær og fólkið var komið til þess að hvetja stolt Mobile, Aron Jóhannsson, áfram.

Fólkið á barnum söng "Aron, Aron, Aron" er hann kom af bekknum fyrir Jozy Altidore á 23. mínútu leiksins.

"Það var gríðarlega gaman að sjá strákinn okkar frá Mobile koma inn á," sagði Dan McMillan frá Mobile í spjalli við al.com.

"Hann virkaði svolítið stressaður í byrjun en svo vann hann sig inn í leikinn. Hann getur vel eignað sér þessa stöðu í liðinu."

Bareigandinn segir að miklu fleiri hafi mætt til þess að styðja liðið núna en árið 2006. Stemningin eftir leik var líka mögnuð og þá söng fólk með lögum eins og "Born in the USA".