Fjölskylda Arons á leið til Brasilíu

Aron Jóhannsson braut blað í íslenskri íþróttasögu þegar hann varð fyrsti leikmaðurinn til að taka þátt í úrslitakeppni HM í knattspyrnu. Þá kom hann inn á sem varamaður er lið hans, Bandaríkin, vann 2-1 sigur á Ganverjum.

Aron kom inn á fyrir sóknarmanninn Jozy Altidore á 23. mínútu þegar sá síðarnefndi tognaði aftan í læri. Eldri bróðir Arons, Ásgeir, sat spenntur heima við sjónvarpsskjáinn og viðurkennir að hjartað hafi byrjað að slá hraðar þegar hann sá að Altidore meiddist.

„Þá vissi maður að hann væri að koma inn og maður var orðinn afar spenntur, svo vægt sé til orða tekið,“ sagði Ásgeir í samtali við Fréttablaðið í gær en hann var þá að undirbúa brottför sína til Brasilíu. Þangað heldur hann með foreldrum Arons, kærustu og umboðsmanni.

Ásgeir óttaðist ekki að Jürgen Klinsmann, þjálfari bandaríska liðsins, myndi setja Chris Wondolowski, hinn sóknarmanninn á varamannabekk Bandaríkjanna, inn á fyrir Altidore.

„Ég þóttist nú vita að Aron væri á undan honum í goggunarröðinni og sem betur fer var það rétt. En svo veit maður ekkert hvað gerist í næsta leik þó svo að ég telji líklegra að Klinsmann verði með Aron í byrjunarliðinu ef Altidore verður enn meiddur.“

Þó svo að Bandaríkin hafi að lokum unnið 2-1 sigur með marki Johns Brooks, annars varamanns, undir lok leiksins, voru Ganverjar sterkari aðilinn lengst af í leiknum og sóttu stíft.

„Það var erfitt fyrir hann að vera framherji í svona leik. Hann fékk ekki úr miklu að moða þegar liðið hans var aðallega að verjast. En Aron átti nokkrar góðar sendingar og þó svo að hann hafi ekki mikið sést í þessum leik kemur það kannski í þeim næsta,“ segir Ásgeir.

Óhætt er að segja að það ríki mikil spenna í hópnum sem fer til Brasilíu en Ásgeir er einnig spenntur fyrir því að fá að upplifa heimsmeistarakeppnina í svo miklu návígi, líkt og hver annar knattspyrnuáhugamaður.

„Þetta verður ekki mikið stærra,“ segir Ásgeir. „Það skemmir svo heldur ekki fyrir að sjá bróður sinn spila.“

Bandaríkin mæta Portúgal í borginni Manaus á sunnudagskvöld en hún er í miðjum regnskóginum. Portúgal steinlá fyrir Þýskalandi í fyrradag, 4-0, en Ásgeir reiknar með erfiðum leik fyrir Aron og samherja hans.

„Portúgal er ekki jafn lélegt og það sýndi gegn Þjóðverjum, svo mikið er víst. Þetta verður afar spennandi leikur því Bandaríkin koma sér í afar góð mál með sigri.“

Ásgeir hafði ekki náð tali af bróður sínum eftir leikinn gegn Ganverjum og átti ekki von á því að ræða við hann fyrr en úti í Brasilíu.

„Það er þétt dagskrá hjá liðinu og maður vill helst ekki vera að trufla. Ég sendi honum bara SMS og óskaði honum til hamingju.“

Ákvörðun Arons um að gefa fremur kost á sér í bandaríska landsliðið en það íslenska var og er enn umdeild en Ásgeir segist fyrst og fremst hafa fengið góð viðbrögð við ákvörðun hans og þátttöku á HM.

„Að minnsta kosti af því að dæma sem ég heyri af fólkinu í kringum mig. Maður les svo ýmislegt neikvætt líka á netinu enda eðlilegt að það séu ekki allir sammála um þetta. En viðbrögðin eru yfirleitt jákvæð og allir virðast mjög hrifnir af öllu saman.“