Fleiri horfðu á Aron en LeBron

„Það var auðvitað leiðinlegt að sjá Altidore meiðast en Aron kom inná og stóð sig vel í leiknum miðað við aðstæður,“ sagði Matthew Eliason, bandaríski framherji Þróttar, þegar Vísir heyrði í honum í dag.

Aron Jóhannsson varð fyrsti Íslendingurinn til þess að taka þátt í lokamóti HM þegar hann kom inná í leik Bandaríkjanna og Gana á dögunum fyrir Jozy Altidore.

Sigur Bandaríkjanna hefur vakið athygli á fótbolta í Bandaríkjunum. Íþróttin hefur oft fallið í skugga ruðnings og körfubolta en skyndilega fylgjast allir íbúar landsins með liðinu. Bandaríkin mæta Portúgal á sunnudaginn.

„Þetta var ótrúlegt, fótbolti er ekki vinsælasta íþrótt landsins en það eru allir að fylgjast með núna. Leikurinn gegn Gana fékk meira sjónvarpsáhorf en úrslitaleikur Miami Heat og San Antonio Spurs í sjónvarpinu úti,“

Matthew fannst einkennilegt en gaman að sjá Íslending í bandaríska liðinu.

„Það var vissulega skrýtið en hann hefur staðið sig vel hjá AZ Alkmaar. Það þekkja margir AZ frá því að Altidore lék þar en Aron hefur staðið sig vel þar,“ sagði Matthew.

Nánar verður rætt við Matthew í Fréttablaðinu á morgun.