Klinsmann ekki búinn að útiloka Altidore

Jürgen Klinsmann hefur ekkert gefið út um batahorfur Jozy Altidore en útilokar ekki að hann spili aftur með bandaríska landsliðinu á HM í Brasilíu.

Altidore tognaði aftan í læri snemma leiks gegn Gana í fyrrakvöld en Aron Jóhannsson kom inn á sem varamaður fyrir hann í 2-1 sigri þeirra bandarísku.

Altidore fór í segulómskoðun í gær, rétt eins og Matt Besler sem einnig var tekinn af velli vegna meiðsla. Klinsmann sagði að Besler yrði klár í slaginn þegar Bandaríkin mætir Portúgal á sunnudag en sagði að það væri meiri óvissa með meiðsli Altidore.

„Við verðum að sjá til hvernig hann bregst við næstu daga. Við erum enn vongóðir um að hann geti spilað meira með okkur í þessu móti,“ sagði Klinsmann við fjölmiðla í gær.

„Læknar og sjúkraþjálfarar liðsins hafa staðið sig frábærlega og við getum enn leyft okkur að vera vongóðir. En tíminn verður að leiða í ljós hvað gerist.“

„Það er auðvitað ferlegt að missa Jozy en við ætlum að gera það besta úr aðstæðum. Við ætlum að fá hann til baka áður en mótið klárast.“