Ekki gerst síðan í fyrsta leik Rooney - Hver er þessi Wilson? | Myndband

Hinn 18 ára gamli James Wilson sló í gegn í kvöld í sínum fyrsta leik í búningi Manchester United en hann skoraði þá tvö mörk í 3-1 sigri á Hull í síðasta heimaleik Manchester United á Old Trafford á leiktíðinni.

Mörkin fjögur úr leiknum á Old Trafford í kvöld sjást hér í myndbandinu hér fyrir ofan.

James Wilson varð fyrsti leikmaður Manchester United í tæp tíu ár til þess að skora meira en eitt mark í sínum fyrsta leik fyrir félagið eða síðan að Wayne Rooney skoraði þrennu í sínum fyrsta leik á móti Fenerbahce haustið 2004.

Ryan Giggs henti James Wilson beint í byrjunarliðið og hann var fremsti maður liðsins en tveir af þremur leikmönnum fyrir aftan hann voru einnig táningar. Tom Lawrence og Adnan Januzaj fengu nefnilega einnig tækifæri í byrjunarliðinu í kvöld. Lawrence var spila sinn fyrsta leik en Adnan Januzaj kom inn í liðið  á síðasta tímabili.

James Wilson verður ekki 19 ára fyrr en seint á árinu en hann var meðal varamanna liðsins í 4-0 sigri á Newcastle í síðasta mánuði. Hann varð í kvöld fjórði yngsti markaskorari félagsins í ensku úrvalsdeildinni en hann er 18 ára, 5 mánaða og 5 daga í dag.

Wilson hefur staðið sig mjög vel með 21 árs liði Manchester United á leiktíðinni þar sem hann skoraði 7 mörk í 9 leikjum og hefur einnig spilað fyrir bæði 16 ára og 19 ára landslið Englands.

Þetta var ekki í fyrsta sinn sem hann skorar í sínum fyrsta leik með liði Manchester United því hann skoraði einnig í fyrsta leik sínum með 18 ára liði félagsins þá aðeins fimmtán ára.

Ryan Giggs hrósaði James Wilson eftir leik og talaði um að hann þarna væri mjög spennandi leikmaður sem væri ekki aðeins góður markaskorari.