Enski bikarinn: Portsmouth fékk annan skell

Nokkrir áhugaverðir leikir voru á dagskrá í enska deildarbikarnum í kvöld og þar bar hæst að Aston Villa, Newcastle og Portsmouth féllu úr leik eftir fremur grátleg töp.

Hermann Hreiðarsson var á ný í liði Portsmouth sem fékk annan skellinn á nokkrum dögum þegar það steinlá 4-0 heima fyrir Chelsea. Portsmouth hefur ekki unnið Chelsea í sextíu ár og á því varð engin breyting í kvöld.

Frank Lampard skoraði tvö mörk fyrir Chelsea í kvöld og þeir Salomon Kalou og Flaurent Malouda sitt markið hvor.

B-deildarliðið QPR gerði sér lítið fyrir og lagði Aston Villa 1-0 á útivelli þar sem Damion Stewart skoraði sigurmark QPR.

Tottenham lagði Newcastle 2-1 á St. Jame´s Park í hrútleiðinlegum leik tveggja liða sem hafa byrjað leiktíðina skelflega í úrvalsdeildinni. Roman Pavlyuchenko og Jamie O´Hara komu gestunum í 2-0 fyrir framan hálftóman völl, en Michael Owen klóraði í bakkann fyrir dapra heimamenn.

Wigan vann 4-1 útisigur á Ipswich og Martin Olsson skoraði sitt fyrsta mark fyrir Blackburn í 1-0 sigri liðsins á Everton á Ewood Park.