Vöktu hálft Garðahverfið með skoteldum

Skömmu fyrir klukkan eitt í nótt var talsvert magn af skoteldum tekið af unglingum, sem vakið höfðu upp hálft Garðahverfið í Reykjanesbæ. Unglingarnir voru vopnaðir öflugri teygjubyssu, sem þeir notuðu til að skjóta skoteldunum með.

Strandaði þegar sjálfstýring bilaði

Lítill plastbátur, Hlöddi VE-98, sigldi upp í fjöru og strandaði um sexleytið í morgun þegar sjálfstýring hans bilaði. Bátur Björgunarfélags Vestmannaeyja var ræstur út og dró hann bátinn á flot og til hafnar. Ekki kom leki að honum en dytta þarf að skemmdum. Tveggja manna áhöfn sakaði ekki.

Kveikt í mörgum ruslagámum í nótt

Töluverður erill var hjá slökkviliði höfuðborgarsvæðisins í gærkvöldi og nótt og þurfti liðið að sinna alls átta útköllum þar sem kveikt hafði verið í ruslagámum.

Arðsemismat Kárahnjúka mögulega endurskoðað

Gríðarleg lækkun hefur orðið á álverði undanfarna mánuði, og kemur til greina að arðsemismat vegna Kárahnjúkavirkjunar verði endurskoðað vegna þessa. Verð á raforku til stóriðju er tengt álverði, og hefur því lækkandi álverð lægri tekjur í för með sér fyrir orkufyrirtæki.

Kaldur í sálinni eftir jólanætur í hesthúsi

„Það er hræðilega dapurlegt þegar þetta er að drepast í höndunum á manni,“ segir þingmaðurinn Árni Páll Árnason, sem hefur varið drjúgum hluta jólanna í hesthúsi í Mosfellsbæ að hjúkra fársjúkum hestum og hjálpa til við að aflífa þá. Hann hefur misst einn hest og á annan við dauðans dyr.

Olíusamráðsmálinu frestað enn um sinn

Olíufélögin fóru fram á frest í máli þeirra gegn Samkeppniseftirlitinu og ríkinu og boðuðu að þau legðu fram nýjar matsbeiðnir í því þegar það var tekið fyrir Héraðsdóm Reykjavíkur fyrr í mánuðinum.

Eitt til tvö íslensk börn ættleidd á ári

Eitt til tvö íslensk ungabörn eru ættleidd á ári hverju og þá gjarnan af skyldmennum. Aftur á móti eru allt að tuttugu börn ættleidd frá útlöndum á hverju ári.

Börnin fá enn þá hádegismat

Fáar vísbendingar eru komnar fram um slæm áhrif kreppunnar á börnin í borginni. Þetta segir Ragnar Þorsteinsson, fræðslustjóri í Reykjavík og formaður „Barnanna í borginni“, viðbragðsteymis sem ætlað er að fylgjast með líðan og högum barna á krepputímum. Teymið tók til starfa í október og hefur síðan hist á viku til tveggja vikna fresti.

Umsóknarfrestur að renna út

Dómsmál Frestur til að sækja um stöðu sérstaks saksóknara sem rannsaka á aðdraganda bankahrunsins rennur út í dag. Björn Bjarnason dómsmálaráðherra mun skipa í embættið frá 1. janúar næstkomandi. Þegar skipað verður í embættið ber sérstaka saksóknaranum að birta opinberlega upplýsingar um hlutabréfaeign sína í fjármálafyrirtækjum og skuldir við þau. Þá þarf hann einnig að upplýsa um starfsleg tengsl hans sjálfs, maka og náinna skyldmenna við þá sem sinnt hafa stjórnunarstöðum í fjármálafyrirtækjunum.

Ráðherra efast um eldflaugar í A-Evrópu

Á fundi utanríkisráðherra Nató í Brussel í byrjun mánaðarins var samþykkt ályktun þar sem eldflaugavarnir voru sagðar hluti varnarvígbúnaðar bandalagsins. Viðurkennt er að „fyrirhugaðar gagneldflaugastöðvar Bandaríkjanna í Evrópu eru mikilvægt framlag til verndar bandalagsríkjunum“. Kannaðir séu leiðir til að „tengja getu þess kerfis við núverandi eldflaugavarnarkerfi Nató til að tryggja að það verði samþættur hluti þeirra kerfa sem í framtíðinni munu tryggja varnir Nató í heild“.

Skerða verður nám fanga að óbreyttu

Skerða verður nám fanga ef ekki kemur til fjárframlag á fjáraukalögum. Fjármagn vantar til að kosta áfram sérstakan námsráðgjafa fyrir fangelsin hér á landi. Þetta segir Örlygur Karlsson, skólameistari Fjölbrautaskóla Suðurlands.

Draga skal úr álagi á dýrin

Hafa þarf sérstaka gát á dýrum um áramótin vegna hræðslu þeirra við flugelda, að því er fram kemur í tilkynningu frá Dýraverndarsambandi Íslands. Kveikja skal ljós þar sem gæludýr eru innandyra til að minna beri á leiftrum, loka gluggum og forðast eftir megni að sprengja flugelda í námunda við dýr.

Gengishækkun aflýst í Laxá á Ásum

Veiðifélag Laxár á Ásum, einnar dýrustu stangveiðiár landsins, mun á fundi milli jóla og nýárs ákveða hvort gefin verður eftir mikil hækkun á leigunni fyrir ána.

Treysta á Guð og lukkuna

Sjóðir Hallgrímskirkju til að ljúka viðgerðum á steypuskemmdum á turni kirkjunnar eru tómir. Ljóst er að viðgerðin verður mun dýrari en áætlað var í fyrstu. Framkvæmdum á að ljúka í október, samkvæmt áætlun, en það er háð því að ríki og borg hlaupi undir bagga með að fjármagna verkið.

Lækkar matarkostnað barna

Bærinn lækkar gjaldskrána ef eitthvað er til að mæta þrengingum og standa með sínu fólki. Til að mæta þröngri stöðu fjölskyldnanna verður niðurgreiðsla á matarkostnaði grunnskólabarna aukinn og fer máltíðin úr 230 krónum niður í 180 krónur. Þá verður tónlistarnám grunnskólabarna gjaldfrjálst frá og með næsta hausti.

Vilja leysa deilu fyrir áramót

Reynt verður að leysa deilu samgönguyfirvalda og Félags íslenskra flugumferðarstjóra (FÍF) á fundi í dag. Loftur Jóhannsson, formaður FÍF, segir fulltrúa samgönguyfirvalda hafa unnið að undirbúningi viðræðna um helgina. Reyna á að leysa málið fyrir áramót.

Fulltrúar lækki launakostnað

Bæjarfulltrúar Sjálfstæðisflokksins í Hafnarfirði vilja lækka kostnað við laun og kjör bæjarstjóra, bæjarfulltrúa og fulltrúa í ráðum og nefndum um allt að 15 prósent á árinu 2009.

Tæp tíu þúsund eru atvinnulaus

Atvinnulausum fjölgar enn og 28. desember voru 9.582 án atvinnu á landinu öllu. Af þeim eru 6.033 karlar og 3.549 konur.

Kostar 15 þúsund að geyma sæði á ári

„Þetta gjald hefur ekkert að gera með kreppuna nema síður sé. Það hittist bara þannig á að fyrst núna gefst okkur færi á að fara að taka til í okkar ranni, fara yfir allt sem við erum að geyma og greiða úr þessu," segir Guðmundur Arason, læknir hjá tæknifrjóvgunarstöðinni Art Medica í Kópavogi. Stöðin hefur nýlega hafið að rukka menn sem geyma hjá þeim sæðisfrumur um 15.000 krónur á ári. Ekkert gjald hefur verið tekið fyrir þjónustuna síðan Art Medica tók við henni af Landspítalanum fyrir fjórum árum, þar til nú fyrir skemmstu.

Kjaraskerðing í Hveragerðisbæ

Laun bæjarstarfsmanna í Hveragerði verða skert samkvæmt drögum að fjárhagsáætlun bæjarins fyrir næsta ár. Bæjarstjórnin gerir líka kröfur til stjórnenda bæjarins um hagræðingu og lækkun rekstrarkostnaðar. Launalækkunin felst í því að umsamin föst yfirvinna starfsmanna verður skert um 10 prósent og föstum bílastyrkjum verður sagt upp og akstur í staðinn greiddur eftir akstursdagbókum. Þá eiga laun bæjarstjórans að lækka um 10 prósent og laun bæjarfulltrúa að lágmarki um 10 prósent.

Grjót hreinsað af gljúfurbotni

Hafist verður handa eftir áramót við að grafa þró á botni Hafrahvammsgljúfurs, neðan við Kárahnjúkastíflu. Er ætlunin að útbúa manngerðan hyl fyrir yfirfallsfoss virkjunarinnar með þró og steyptri stíflu.

Misferli í Gift verði rannsakað

Sveitarstjórn Djúpavogshrepps kvefst þess að forsvarsmenn Giftar/Samvinnutrygginga GT upplýsi hvernig höndlað var með eignarhluti hreppsins og annarra eigenda í Gift. „Jafnframt samþykkir sveitarstjórn að óska eftir því við lögfræðideild Sambands íslenzkra sveitarfélaga að hún sjái til þess að fram fari opinber rannsókn á því misferli sem þarna virðist hafa átt sér stað, þegar almannafé, sem var meðal annars eyrnamerkt nokkrum sveitarfélögum, mun hafa verið notað til glæfralegra fjárfestinga, án nokkurs samráðs við eigendur fjárins.“

Stefnumótun skammt komin

Mótun öryggissjálfsmyndar Íslands og öryggismálastefnu er skammt á veg komin, þrátt fyrir gerbreytta umgjörð þeirra mála. Að þessari niðurstöðu kemst Silja Bára Ómarsdóttir stjórnmálafræðingur í grein í nýjasta „hefti“ vefritsins Stjórnmál og stjórnsýsla (stjornmalogstjornsysla.is).

Fæðingar á Grænlandi færri en fóstureyðingar

Fóstureyðingar á Grænlandi á árinu 2006 voru 1.030 miðað við hver 1.000 lifandi fædd börn. Þetta er langhæsta hlutfall fóstureyðinga á Norðurlöndunum að því er sjá má í Talnabrunni, fréttabréfi Landlæknis.

Kosta um 140 milljónir á ári

Heilbrigðisráðherra, Guðlaugur Þór Þórðarson, undirritaði nýverið tvo samninga um sjúkraflutninga. Annan við Slökkvilið Akureyrar og hinn við Brunavarnir Suðurnesja. Heilbrigðisráðuneytið greiðir um sjötíu milljónir króna á ári fyrir hvorn samning.

Skilur óánægju vegna ummæla um flugeldasölu

Jón Magnússon, þingflokksformaður Frjálslynda flokksins, skilur óánægju Kristins Ólafssonar, framkvæmdastjóra Slysavarnarfélagsins Landsbjargar, með þau orð sem Jón lét falla í morgun þegar hann hvatti fólk til að kaupa ekki flugelda.

Nám er betra en bætur

Þó nú sé útlit fyrir að ekki komist allir í framhalds- og háskóla landsins, lofar menntamálaráðherra að gera allt til að koma öllum inn í skóla sem vilja.

Launakröfur fyrir dómstóla

Launakröfur millistjórnendur gömlu viðskiptabankanna gætu hafnað fyrir dómstólum. Túlkun umsjónarmanna með greiðslustöðvun ræður því hvort millistjórnendurnir eigi forgangskröfu í þrotabú vegna vangoldinna launa. Lögin eru háð túlkun. Þetta kom fram í kvöldfréttum Ríkisútvarpsins.

Verslunum ekki lokað í byrjun árs

Ekki stendur til að loka neinum búðum hjá stærstu verslanakeðjum landsins í byrjun árs. Þá eru uppsagnir eða launalækkanir ekki fyrirhugaðar.

Útsölur fara rólega af stað

Íslendingum hefur oftar en ekki verið eignaður sá vafasami heiður að vera allra þjóða kaupglaðastir. Við eigum þó ekki roð í Bretana ef marka má þessa fyrstu daga útsölunnar.

Nafn hinnar látnu

Banaslys varð við Reykjanesbraut á sjötta tímanum í gær þegar Freyja Sigurðardóttir til heimilis að Burknavöllum 17b Hafnarfirði lést. Hún var sextug að aldri. Hún lætur eftir sig tvær uppkomnar dætur, barnabörn og unnusta.

Undirbúningur mótframboðs gegn Gunnari gengur vel

Vel gengur að undirbúa mótframboð gegn Gunnari Páli Pálssyni, formanni VR, og stjórn félagsins, að sögn Lúðvíks Lúðvíkssonar félagsmanns í VR sem var meðal þeirra sem fóru fyrir mótmælum gegn stjórn VR í haust. Lúðvík íhugar að gefa kost á sér sem formaður.

Íhugaði ekki að hætta

Hanna Birna Kristjánsdóttir, borgarstjóri, íhugaði ekki að segja af sér sem borgarfulltrúi og hætta afskiptum af stjórnmálum þegar hvað mest gekk á borgarstjórn Reykjavíkur fyrr á árinu. ,,Mér leið ekki þannig persónulega. Ég hef mikla ástríðu fyrir stjórnmálum," sagði Hanna Birna sem var gestur Sigurjóns M. Egilssonar í þættinum Sprengisandi fyrr í dag.

Vekja athygli á hræðslu dýra vegna flugelda

Nú þegar áramótin eru framundan vill Dýraverndarsamband Íslands vekja athygli á þeirri ógn sem dýrum stafar af flugeldum og sprengingum með viðeigandi hávaða og óhjákvæmilegri mengun andrúmsloftsins. ,,Munum að dýrin eru skyni gæddar tilfinningaverur eins og við," segir í tilkynningu.

Atvinnulausum fjölgar um 1377 á hálfum mánuði

Atvinnulausum hefur fjölgað um 1377 á tæpum tveimur vikum. Samkvæmt vef Vinnumálastofnunar eru nú 9582 einstaklingar skráðir atvinnulausir. 11. desember eru 8205 manns skráðir atvinnulausir, en í lok nóvembermánaðar voru 6350 skráðir atvinnulausir.

Ummæli Jóns um flugelda út í hött

Kristinn Ólafsson, framkvæmdastjóri Slysavarnarfélagsins Landsbjargar, segir að ummæli Jóns Magnússonar, þingflokksformanns Frjálslynda flokksins, um að fólk eigi að spara og sleppa því að kaupa flugelda séu kjánaleg og út í hött.

Umsóknarfrestur vega sérstaks saksóknara rennur út

Umsóknarfrestur vegna embættis sérstaks saksóknara sem ætlað er að rannsaka grun um refsiverða háttsemi í aðdraganda og kjölfar bankahrunsins rennur út á morgun. Ekki fengust upplýsingar um hversu margir hafa sótt um stöðuna né hvort birt verði nöfn umsækjenda.

Slæmt að ekki sé tekið á móti öllum háskólanemum

Útlit er fyrir að ekki verði hægt að taka á móti öllum þeim nemendum sem hafa sótt um skólavist í háskólum landsins. Mjög slæm staða segir þingmaður í menntamálanefnd, sem vill að það verði skoðað hvort hægt sé að breyta kennsluháttum í einhverjum tilfellum svo taka megi á móti fleiri nemendum.

Þingmaður hvetur fólk til að kaupa ekki flugelda

Jón Magnússon, þingflokksformaður Frjálslynda flokksins, hvetur fólk til að spara og kaupa ekki flugelda þetta árið. Með flugeldakaupum sé fólk að henda peningum. Hann var gestur Sigurjóns Egilssonar í þættinum Sprengjusandi í morgun þar sem meðal annars rætt um hvernig almenningur getur sparað. Auk þess talaði Jón fyrir því að fólk minnkaði gosdrykkju sína. Jón var eitt sinn formaður Neytendasamtakanna.

Greiðfært víða um land

Vegagerðin varar við flughálku á Steingrímsfjarðarheiði á Vestfjörðum. Annars er greiðfært á Suðurlandi, Suðausturlandi, Vesturlandi og víðast á Vestfjörðum og Norðurlandi nema hálkublettir eru á Mývatnsöræfum. Á Austfjörðum er hálka og hálkublettir.

Skíðasvæðin í Tindastól og Hlíðarfjalli opin

Skíðasvæðið í Tindastól verður opið til klukkan 16 í dag. Þar er nægur og góður snjór og færið gott. Þá er einnig opið í Hlíðarfjalli við Akureyri til klukkan 16.

Róleg nótt hjá lögreglu - bílvelta í Öxarfirði

Nóttin var með rólegasta móti samkvæmt lögreglu víða um land. Ung stúlka var flutt á sjúkrahúsið á Akureyri rétt eftir miðnætti í gærkvöld eftir bílveltu í Öxarfirði í grennd við Húsavík. Að sögn lögreglu voru tvær ungar stúlkur í bifreiðinni og kastaðist ökumaður hennar út úr bifreiðinni við veltuna. Stúlkan er ekki talin vera mikið slösuð.

Ökumaður lét lífið á Reykjanesbraut

Banaslys varð við Reykjanesbraut á sjötta tímanum í gær. Tildrög slyssins eru ekki að fullu ljós en svo virðist sem að bifreiðin hafi lent á ljósastaur og endað fyrir utan veg á hvolfi í kjölfarið.

Íslenska bókin er ónæm fyrir kreppunni

Íslenska bókin er ónæm fyrir kreppunni. Aldrei áður hafa fleiri bækur selst en nú fyrir þessi jól. Arnaldur Indriðason gnæfir yfir aðra rithöfunda og seldi í kringum 30 þúsund eintök af skáldsögu sinni Myrká.

Reykjanesbraut opnuð á ný eftir alvarlegt umferðarslys

Reykjanesbraut hefur verið opnuð á nýjan leik eftir að alvarlegt umferðarslys varð á sjötta tímanum í dag. Talið er að slysið hafi orðið með þeim hætti að bifreið var ekið á ljósastaur sem fór nokkrar veltur og endaði utan vega á hvolfi. Í fyrstu var talið að tveir bílar hefðu lent saman. Ökumaður bifreiðarinnar er talinn alvarlega slasaður.