Ummæli Jóns um flugelda út í hött

Kristinn Ólafsson, framkvæmdastjóri Slysavarnarfélagsins Landsbjargar, segir að ummæli Jóns Magnússonar, þingflokksformanns Frjálslynda flokksins, um að fólk eigi að sleppa því að kaupa flugelda séu kjánaleg og út í hött.

Jón var gestur Sigurjóns M. Egilssonar í þættinum Sprengisandi í morgun og þar hvatti hann almenning til að spara og kaupa ekki flugelda þetta árið. Með flugeldakaupum væri fólk að henda peningum.

,,Ég skil áhyggjur þingmannsins en mér fannst alveg út í hött að byrja á því að ráðast á flugeldanna sem er vitað að séu stærsta og mikilvægasta fjáröflun björgunarsveitanna og kjölfestan í gleði barna um áramótin," segir Kristinn. Nær hefði verið ef Jón hefði stungið upp á að fólk keypti minna af áfengi um áramótin. ,,Þetta eru náttúrulega kjánaleg ummæli hjá þingmanninum og alveg út í hött."

Flugeldasalan hófst í dag

,,Með því að kaupa flugelda hjá sínum björgunarsveitum er fólk að efla björgunarsveitir í eigin byggðalagi," segir Kristinn.

Árleg flugeldasala Slysavarnafélagsins Landsbjargar hefst í dag.

Kristinn segir að flugeldasalan standi undir rekstri og fjárfestingum björgunarsveita á öllu landinu. ,,Þetta er okkar langstærsta fjáröflun. Hún skiptir gríðarlega miklu máli."

Fjölmargir sölustaðir

Samkvæmt lögum ekki er heimilt að selja flugelda nema frá 28. desember og fram að þrettánda. Sölustaðir eru fjölmargir en til marks um það má þess geta að flugeldamarkaðir björgunarsveitannar eru á 112 stöðum um land allt. Þar á bæ eiga menn von á samdrætti í sölu frá því í fyrra en þá var metár í sölu flugelda.

Framboð aukið

Helstu nýjungar eru fjórar tertur, Víkingatertan, sem skreytt er mynd af útrásarvíkingum landsins, Bankatertan, með bankamönnum, Stjórnmálatertan, með stjórnmálamönnum og Íslandstertan með íslenskum almenningi. Halldór Bjarnason teiknaði myndirnar sem prýða nýju terturnar.

,,Þetta er meira til gamans gert. Við erum að auka framboðið en við verðum áfram með Sturlungatertur," segir Ólöf Snæhólm Baldursdóttir, upplýsingafulltrúi Slysavarnarfélagsins Landsbjargar, aðspurð hvort hún haldi að landsmenn hafi áhuga á nýju tertunum. Ólöf segir að fólk þurfi ekki að vera útrásarvíkingar til að hafa efni á nýju Víkingatertunni.