Liver­pool gæti komið Brighton í Meistara­deild Evrópu

Arsenal, Manchester City, Manchester United og Aston Villa verða í Meistaradeildinni í haust og mjög líklega Liverpool einnig. Brighton eða Bournemouth bætist í hópinn ef og aðeins ef Villa endar í 5. sæti á sunnudaginn.

Fimm efstu liðin í ensku úrvalsdeildinni eiga öruggt sæti í Meistaradeildinni og er Liverpool í 5. sætinu, þremur stigum fyrir ofan Bournemouth og með sex mörkum betri markatölu. 

Bournemouth þyrfti því að vinna Nottingham Forest á útivelli og Liverpool að tapa gegn Brentford á heimavelli, með samtals sex marka sveiflu, til að Liverpool færi niður í 6. sæti og missti af sæti í Meistaradeild Evrópu.

Ef Liverpool vinnur hins vegar Brentford, og Villa tapar á útivelli gegn Manchester City, kemst Liverpool upp í 4. sæti og sendir Villa niður í 5. sæti.

Þetta myndi gera að verkum að liðið í 6. sæti, þá Bournemouth eða Brighton, fengi sæti í Meistaradeild Evrópu.

Sigri í Evrópudeildinni fylgir nefnilega sæti í Meistaradeild Evrópu en ef sigurvegarinn endar hvort sem er í hópi fjögurra efstu liða úrvalsdeildarinnar, sem alltaf eru örugg sæti í Meistaradeildinni, þá fær annað land „aukasætið“. Hið sama gildir ef Arsenal vinnur Meistaradeildina 30. maí.

En af því að England er líka þegar búið að fá „aukasæti“ með árangri enskra liða í Evrópukeppnum í vetur, fimmta sætið, þá mun sjötta enska liðið fá að fara í Meistaradeildina ef Villa endar í 5. sætinu.

Ef Villa heldur hins vegar 4. sæti þá munu aðeins fimm lið frá Englandi fara í Meistaradeild Evrópu og „aukasætið“ í keppninni fara til Sporting Lissabon sem er næst inn af styrkleikalista UEFA.