Þjálfari Magdeburg sækist ekki eftir starfi Al­freðs

Samningur hins 66 ára Alfreðs rennur út eftir HM í Þýskalandi 2027 og nú þegar eru sögusagnir á sveimi um væntanlegan eftirmann hans. Wiegert hefur helst verið nefndur í því samhengi, eftir frábæran árangur sem þjálfari Magdeburg.

Magdeburg hefur meðal annars unnið Meistaradeild Evrópu og heimsmeistaramót félagsliða undir hans stjórn og er nú á hraðleið með að vinna þýsku úrvalsdeildina.

Hann ætlar hins vegar ekki að sækjast eftir starfi Alfreðs.

„Að mitt nafn sé nefnt er mikið hrós, fyrir fjórum eða fimm árum var það ekki þannig. Ég fel mig ekkert frá því að þetta starf var einu sinni á markmiðalistanum hjá mér en á þessum tímapunkti get ég ekki ímyndað mér að taka við því. Mér líður svo vel hjá Magdeburg, eins og heima hjá mér, og mig langar að halda áfram að vera viðloðinn hlutina hér,“ sagði Wiegert við Bild.

Þeir Alfreð þekkjast líka frá tíma Wiegert sem leikmaður Gummersbach.

„Ég á sérstakt samband við Alfreð og óska honum alls hins besta, hámarksárangri. Sérstaklega á HM á heimavelli, móti sem er svo mikilvægt fyrir okkur öll,“ sagði Þjóðverjinn.