Arsenal er Englandsmeistari

Arsenal er Eng­lands­meistari í fót­bolta tíma­bilið 2025/2026. Þetta varð ljóst eftir jafntefli Manchester City gegn Bour­nemouth á úti­velli í kvöld. Um fyrsta Eng­lands­meistara­titil Arsenal er að ræða síðan árið 2004, sá fjórtándi í röðinni og sá fyrsti undir stjórn Mikel Arteta. Tuttugu og tveggja ára bið á enda.

Manchester City þurfti sigur í kvöld gegn Bournemouth til þess að halda lífí í titilbaráttunni fram í lokaumferð ensku úrvalsdeildarinnar um komandi helgi. Sigri tókst lærisveinum Pep Guardiola ekki að landa og þar með endar Englandsmeistaratitillinn hjá Arsenal.

Gífurlega vel að verki staðið hjá Skyttunum sem höfðu lengst af tímabils verið á toppi ensku úrvalsdeildarinnar. Þegar að á móti blés sýndi meistaraliðið styrk og lét aldrei undan.

Eftir langa bið, frá því að Thierry Henry og liðsfélagar hans undir stjórn Arsené Wenger fóru ósigraðir í gegnum tímabil og enduðu sem Englandsmeistarar árið 2004, geta stuðningsmenn Arsenal nú fagnað dátt.

Arsenal hefur undanfarin þrjú tímabil reynt að landa þeim stóra en ávallt endað í 2.sæti deildarinnar. Rós í hnappagat knattspyrnustjórans Mikel Arteta sem hefur komið Arsenal aftur í fremstu röð.

Skytturnar eiga möguleika á að vinna tvöfalt í ár því Arsenal er komið í úrslitaleik Meistaradeildar Evrópu og mætir þar ríkjandi Evrópumeisturum Paris Saint-Germain í Búdapest þann 30.maí næstkomandi. Áður en að því kemur heimsækir Arsenal, Crystal Palace á Selhurst Park í lokaumferð ensku úrvalsdeildarinnar og mun þar lyfta bikar á loft.

Um annan stóra titil Arsenal er að ræða undir stjórn Mikel Arteta sem tók við sem knattspyrnustjóri liðsins í desember árið 2019. Liðið vann enska bikarinn á sínu fyrsta tímabili undir stjórn Spánverjans.

Bournemouth í fyrsta sinn í Evrópukeppni

Jafntefli Bour­nemouth í kvöld gull­tryggði að liðið spilar í Evrópu­keppni í fyrsta sinn í sögunni á næsta tíma­bili.

Það var Juni­or Kroupi sem skoraði markið mikilvæga fyrir Bour­nemouth gegn Manchester City í kvöld á 39.mínútu en Erling Haaland jafnaði metin fyrir Manchester City í uppbótartíma en það var bara of seint fyrir bláa liðið úr Manchesterborg. Manchester City mun enda í 2.sæti deildarinnar á því sem virðist vera síðasta tíma­bil Pep Guar­diola með liðið.