Kaldasta fagnið í bransanum orðið að vöru­merki

Palmer gerði fyrst „Cold Palmer“ gælunafnið að vörumerki og færði svo út í kvíarnar, hann gerði nafn sitt „Cole Palmer“ og skammstöfunina „CP“ að vörumerki og einnig ímyndarrétt tengdan andliti hans, en hann þykir frekar sérkennilegur í fasi.

Þá er fagnið sem hann hefur gert frægt orðið að vörumerki. 

Palmer sendi inn stutt myndskeið til að sýna hvernig fagnið er framkvæmt. Myndskeiðið hefur ekki verið gert opinbert en aðdáendur ensku úrvalsdeildarinnar hafa séð fagnið þónokkuð oft undanfarin ár.

Palmer fékk leyfi fyrir flestöllu sem hann sótti um, þar með talið fagninu, en fékk ekki leyfi til þess að framleiða vín undir Palmer nafninu því það brýtur gegn höfundarrétti frönsku vínekrunnar Chateau Palmer, sem tengist leikmanninum ekki neitt.

Hann má þó framleiða aðra áfenga drykki, gos, orkudrykki eða hvað annað undir nafninu „Cold Palmer.“

Þetta þýðir líka ekki að hann einn megi framkvæma fagnið fræga. Aðrir leikmenn mega alveg láta eins og þeim sé kalt þegar þeir skora, en þeir mega ekki taka myndir af sér í svona fagnaðarlátum og selja á fatnaði eða í auglýsingar.