Upp­gjörið: FH - ÍA 3-2 | Ótrú­leg endur­koma heima­manna í Kapla­krika

Það var hreint stórkostlegur fótboltaleikur sem gömlu stórveldin ÍA og FH buðu upp á á Kaplakrikavelli í kvöld. Heimamenn höfðu á endanum 3-2 sigur í ótrúlegum leik þar sem áhorfendur fengu heldur betur eitthvað fyrir peninginn. Fimm mörk, tvær vítaspyrnur, tvö rauð spjöld og hellingur af dramatík í alvöru fallbaráttuslag þessara sigursælu liða.

Gestirnir af Skaganum byrjuðu miklu betur og skoruðu fyrsta mark leiksins strax á 5. mínútu. FH átti þá hornspyrnu sem Skagamenn skölluðu í burtu og brunuðu upp í skyndisókn. Gabríel Snær Gunnarsson braust upp hægri vænginn og gaf hárnákvæma sendingu á Hauk Arnar Haraldsson sem kláraði færið með þéttingsföstu skoti á nærstöngina. 0-1 fyrir Skagamenn.

Gestirnir létu kné fylgja kviði eftir markið og sóttu hart að FH markinu. Skagamenn voru að spila glimrandi skemmtilegan fótbolta á þessum kafla og uppskáru annað mark á 21. mínútu þegar Jón Gísli Eyland fékk boltann eftir klafs fyrir utan vítateig FH og lét vaða að marki. Óverjandi skot fyrir Mathias Rosenorn í marki FH, 0-2 fyrir gestina.

Rúnar Már Sigtryggsson var svo hársbreidd frá því að gera út um leikinn nokkrum mínútum síðar þegar hann lét vaða að marki FH af 25 metrunum og boltinn söng í stönginni innanverðri. Þetta hefði klárlega verið eitt af mörkum sumarsins ef skotið hefði legið inni.

Á 39 mínútu hefst svo æsingur upp við varamannabekkina sem átti eftir að draga dilk á eftir sér. Fyrrum liðsfélagarnir Heimir Guðjónsson þjálfari FH og Dean Martin aðstoðarþjálfari ÍA lenda í öskurkeppni sem endar með því að þeim er báðum sýndur reisupassinn. Við þetta snerist leikurinn algjörlega á haus, mikil harka færðist í leikinn næstu mínútur og FH liðið mætti loks til leiks. Þeir fengu aukaspyrnu á hættulegum stað á 41. mínútu sem Kjartan Kári snýr frábærlega inn á teiginn og Ísak Óli Ólafsson sparkar boltanum í hausinn á sér og fram hjá Árna Marínó í markinu.

Síðustu mínútur fyrri hálfleiks voru ansi fjörlegar. FH-ingar halda pressu sinni áfram og á 45. mínútu fær Erik Tobias Sandberg fyrirgjöf Kjartans Kára í hendina á sér og Helgi Mikael flautar réttilega vítaspyrnu. Kjartan Kári tekur spyrnuna sjálfur en Árni Marínó ver meistaralega í markinu. Staðan í hálfleik 1-2 fyrir Skagamenn sem voru ekki bara betri, heldur miklu betri aðilinn í 40 mínútur í fyrra hálfleiknum.

FH-ingar byrjuðu af sama krafti í síðari hálfleiknum og fengu aðra vítaspyrnu strax á 53. mínútu þegar Gísli Laxdal ýtti við Sigurði Bjarti í vítateig Skagamanna. Nú var það fyrirliðinn Björn Daníel sem steig fram fyrir skjöldu og fékk það verkefni að skjóta sína menn aftur inn í leikinn. Á einhvern óskiljanlegan hátt reyndi Björn Daníel að vippa boltanum í markið, auðveldasta varsla leiksins fyrir Árna Marínó og það fór vandræðalegur kliður um stúkuna á Kaplakrika.

Aðeins 6 mínútum síðar slapp Sigurður Bjartur laus inn fyrir vörn Skagamanna og sýndi fyrirliðanum sínum hvernig maður vippar boltanum, stórkostleg afgreiðsla hjá framherjanum öfluga, yfir Árna Marínó í markinu. Eftir þetta mark var í raun bara tímaspursmál hvenær FH-ingar næðu inn sigurmarkinu. Þeir voru með öll völd á leiknum og Skagamenn áttu fá svör upp í erminni.

Það var svo á 71. mínútu þegar Böðvar Böðvarsson á langa sendingu frá miðlinu inn fyrir vörn gestanna, téður Sigurður Bjartur Hallsson kassar boltann niður og hamrar honum í fyrsta framhjá Árna í markinu.

Ef eitthvað var þetta glæsilegra mark en það fyrra og kóronaði frábæran leik Sigurðar. Tvö mörk og fiskað víti. Ágætis dagsverk.

Skagamenn settu nokkra pressu á FH-inga á síðustu mínútum leiksins, sem óhjákvæmilega bökkuðu niður að eigin vítateig eftir þriðja markið. Þeir fengu þó engin opin færi og Mathias í markinu sá við öllu sem Skagamenn kokkuðu upp. Lokatölur 3-2 fyrir FH í frábærum knattspyrnuleik.

Atvikið

Að mínu mati er atvik leiksins þessi uppákoma á varamannabekk liðanna á 39. mínútu. Heimi Guðjónssyni þjálfara FH og Dean Martin aðstoðarþjálfara ÍA lendir saman á varamannabekknum og hljóta báðir rautt spjald fyrir frá Helga Mikael. Þetta kveikti ekki bara á leikmönnum FH heldur einnig stúkunni og á næstu 30 leikmínútum skora FH-ingar 3 mörk og klúðra tveimur vítum – með xG upp á ca 4.0. Talandi um að fórna sér fyrir liðið. Heimir kveikti heldur betur í sínum mönnum.

Stjörnur og skúrkar

Sigurður Bjartur er alvöru nía og hann sýndi það aftur í kvöld. Báðar afgreiðslurnar voru úr hæstu hillu og aðdragandi síðara marksins var einnig stórkostlegur. Þá kassar hann niður langa sendingu frá Böðvari áður en hann neglir boltanum í fyrsta framhjá Árna Marínó í markinu. Maður leiksins.

Árni Marínó hélt sínum mönnum inn í leiknum á löngum köflum. Varði tvö víti og bjargaði frábærlega nokkrum sinnum í síðari hálfleiknum þegar FH-ingar voru í sem mestu stuði.

Erik Tobias átti erfitt uppdráttar í vörn Skagamanna. Hann fékk gult spjald eftir 2 mínútna leik og það átti eftir að hafa áhrif á hann út leikinn. Hann gaf fyrra vítið og lét Sigurð Bjart fara illa með sig nokkrum sinnum í síðari hálfleiknum.

Dómarar leiksins

Það var alveg greinilegt að Helgi Mikael er ekkert sá vinsælasti hér á Kaplakrika. Hann hins vegar negldi allar stóru ákvarðanirnar í þessum leik. Vísaði Heimi og Dean réttilega til búningsherbergja, náði báðum vítadómunum réttum og hélt leik sem var á suðupunkti á löngum köflum frá því að fuðra upp í algjöra vitleysu. Hann á hrós skilið í kvöld.

Stemmning og umgjörð

Þvílík aðstaða sem FH-ingar eru með. Það er geggjað að koma í Kaplakrikann og hugsunarhátturinn hér er greinilega sá að félagið sé allt á sama staðnum. Þetta er ekkert ósvipað því og að koma inn á campus hjá amerískum háskóla.

Það var mikil reiði og pirringur í stúkunni framan af leik. Heimamenn skiljanlega ósáttir við frammistöðu sinna manna. Það snerist svo algjörlega á sama tíma og leikurinn. Orkan í stúkunni var rosaleg í síðari hálfleiknum og stuðningsmennirnir eiga klárlega stóran þátt í sigri FH-inga hér í kvöld.