Veður

Vindur með hægasta móti og frost að fimm stigum

Atli Ísleifsson skrifar
Frost verður á bilinu núll til fimm stig í dag og á morgun.
Frost verður á bilinu núll til fimm stig í dag og á morgun. Vísir/Vilhelm

Veðurstofan gerir ráð fyrir að vindur verði áfram með hægasta móti og að áttin verði ýmist vestlæg eða breytileg.

Í hugleiðingum veðurfræðings kemur fram að það verði bjartir kaflar nokkuð víða á landinu, en sums staðar dálitlar skúrir eða él við norður- og vesturströndina.

„Á morgun snýst í norðan- og norðaustanátt og vindur yfirleitt fremur hægur, en gægist yfir 10 m/s nærri austursröndinni. Svolítil él um landið norðaustanvert, en bjartviðri sunnan- og vestanlands.

Frost í dag og á morgun víða á bilinu 0 til 5 stig, en sums staðar frostlaust við sjóinn.

Spár gera ráð fyrir að norðaustan- og norðanátt verði síðan ráðandi út vikuna með éljum norðan- og austanlands, en bjart að mestu sunnan heiða. Svo virðist sem þessi norðanáttarkafli verði í meinlausari kantinum, allavega hefur norðanáttin oft verið hvassari og meiri kuldi og/eða úrkoma fylgt með,“ segir á vef Veðurstofunnar.

Spákort fyrir klukkan 14 í dag.Veðurstofan

Veðurhorfur á landinu næstu daga

Á miðvikudag: Norðaustan og norðan 3-8 m/s, en 8-13 með austurströndinni. Lítilsháttar él um landið norðaustanvert, en bjartviðri sunnan- og vestanlands. Frost 0 til 7 stig.

Á fimmtudag og föstudag: Norðan 8-15 og él norðan- og austantil, en bjart með köflum sunnan- og suðvestanlands. Frost víða 0 til 4 stig.

Á laugardag og sunnudag: Norðaustanátt og él norðaustan- og austanlands, en léttskýjað á Suður- og Vesturlandi. Hiti breytist lítið.

Á mánudag: Líkur á stífri norðanátt með éljum, en bjart sunnan heiða. Kólnar í veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.