Frestuðu ávarpi Pútíns um innlimun til morguns

Því var frestað til sex en ávarpið var heldur ekki birt þá.

Upp úr klukkan sjö í kvöld sagði Margarita Simonyan, yfirmaður ríkismiðilsins RT, á samfélagsmiðlum að fólk ætti bara að fara í háttinn. Þannig gaf hún til kynna að ávarpið yrði ekki birt í kvöld og var það staðfest af Kreml skömmu síðar. Ávarpið verður þess í stað birt í fyrramálið.

Þetta hefði verið fyrsta ávarp Pútíns frá því í febrúar þegar hann tilkynnti hina svokölluðu „sértæku hernaðaraðgerð“, eins og Rússar kalla innrásina í Úkraínu.

Líkur hafi verið leiddar að því að Pútín ætli í ávarpi sínu að ræða ætlanir sínar varðandi mögulega herkvaðningu og áætlanir um að innlima fjögur héruð Úkraínu í Rússland..

Ætla að innlima fjögur héruð

Rússar og leppstjórnir þeirra á hernumdum svæðum Úkraínu tilkynntu í dag að í vikunni myndi fara fram atkvæðagreiðsla á þessum svæðum um innlimun þeirra í rússneska sambandsríkið.

Vert er að taka fram að atkvæðagreiðslur þessar og væntanleg innlimun héraðanna er brot á alþjóðalögum.

Sjá einnig: Ætla sér að kjósa um innlimun í Rússland

Um er að ræða héruðin Donetsk og Luhansk í austurhluta landsins og Kherson og Saporisjía í suðurhluta landsins. Rússar stjórna um sextíu prósentum af Donetsk og nánast öllu Luhansk-héraði en Úkraínumenn eru þó að sækja fram gegn Rússum þar. Þá eru Rússar ekki heldur með fulla stjórn á Kherson og Saporisjía en í Kherson-héraði eiga Úkraínumenn í umfangsmikilli gagnsókn gegn hersveitum Rússa á norðurbakka Dnipro-ár.

Rússar stjórnuðu einnig nýverið stórum hluta Kharkív-héraðs en voru nýverið reknir þaðan.

Úkraínumönnum hefur vegnað vel á vígvöllunum í Úkraínu undanfarnar vikur og halda þeir Rússum á hælunum víðast hvar á víglínunum í Úkraínu. Úkraínumenn ógna jafnvel ávinningi Rússa í Donetsk og Luhansk.

Frá því innrás Rússa hófst hafa fregnir borist af manneklu í rússneska hernum og er útlit fyrir að þau vandræði hafi ágerst að undanförnu.

Rússar hafa ekki haft burði til að sækja fram gegn Úkraínumönnum um nokkra vikna skeið.

Sjá einnig: Alvarlegir gallar á rússneska hernum

Gætu sent lítið þjálfaða fótgönguliða til Úkraínu

Með því að lýsa því yfir að átakasvæðin í Úkraínu séu í raun hluti af Rússlandi gætu Rússar reynt að bæta stöðu sína, í það minnsta til skamms tíma og mögulega farið í einhvers konar herkvaðningu. Hún gæti bæði verið almenn eða minni í sniðum.

Rússar halda nú um fimmtán prósentum af Úkraínu og ráðamenn í Moskvu eru þegar byrjaðir að tala um að eftir innlimun verði litið á árás á þessi svæði sem árás á Rússland.

Rússar kalla tvisvar sinnum á ári hundrað til 150 þúsund menn til herþjónustu í eitt ár. Lögum samkvæmt má ekki nota þá utan landamæra Rússlands, án þess að stríðsyfirlýsing liggi fyrir. Rússar hafa aldrei lýst yfir stríði í Úkraínu en með því að segja þessi héruð í Úkraína tilheyra Rússlandi getur Pútín ef til vill sent þessa hermenn til Úkraínu í flýti.

Þessir hermenn eru eðli málsins samkvæmt lítið þjálfaðir og sérfræðingar segja ólíklegt að þeir muni hjálpa Rússum við að sækja fram gegn Úkraínumönnum. Þeir geta þó verið notaðir til varna og þannig leyst aðrar hersveitir atvinnuhermanna að hólmi, sem hægt yrði að nota til árása.

Almenn herkvaðning myndi líklegast ekki skila Rússum miklum árangri. Minni herkvaðning, þar sem fyrrverandi atvinnuhermenn sem búa yfir grunn- og sérþekkingu og þjálfun sem Rússar þurfa á að halda yrðu þvingaðir aftur í herinn, gæti þó hjálpað Rússum og myndi taka mun minni tíma en almenn herkvaðning þar sem  nauðsynlegt yrði að þjálfa mikinn fjölda óreyndra hermanna.

Vill þrýsta á bakhjarla Úkraínu

Annað markmið Pútíns með innlimun héraðanna fjögurra gæti verið að reyna að draga úr kjarki bakhjarla Úkraínu. Að láta á það reyna að hvort ráðamenn í Vesturlöndum vilji útvega Úkraínumönnum vopn sem þeir nota til að gera árásir á „Rússland“. Joe Biden, forseti Bandaríkjanna, hefur til að mynda meinað Úkraínumönnum að nota bandarísk vopn til að gera slíkar árásir.

Miðað við fyrstu viðbrögð í Vesturlöndum virðist þó sem að þetta muni ekki virka fyrir Rússa. Hvíta húsið segir til að mynda að þessi atkvæðagreiðsla muni engu skipta og það hafa aðrir bakhjarlar Úkraínu tekið undir.

Sjá einnig: Vilja fleiri vopn eftir vel heppnaða gagnsókn

Jake Sullivan, einn af talsmönnum Joe Biden, forseta Bandaríkjanna, sagði í dag að Bandaríkin myndu aldrei viðurkenna innlimun Rússa á áðurnefndum héruðum Úkraínu. Þessar atkvæðagreiðslur væru brot á fullveldi Úkraínu Bandaríkin höfnuðu þeim alfarið, samkvæmt Washington Post.

Joe Biden og starfsmenn hans vinna hörðum hödnum að því að stappa stálinu í aðra bakhjarla Úkraínu, samkvæmt frétt New York Times og hafa heitið Úkraínumönnum langvarandi hernaðaðstoð og fjárhagsaðstoð. Enn sem komið er segjast Bandaríkjamenn ekki sjá sprungur í bandalaginu en óttast er að það gæti breyst í vetur og þá sértaklega í Evrópu, þar sem orkuverð hafa hækkað gífulega og stefnir í skort á jarðgasi sem meðal annars er notað víða til að hita hús.

Kaja Kallas, forsætisráðherra Eistlands, tísti um vendingarnar í dag og sagði að innlimun yrði aldrei samþykkt. Hún sagði Úkraínumenn eiga rétt á því að verja sig og að aðgerðir Rússa hefðu líklegast öfug áhrif og að stuðningurinn við Úkraínu yrði frekar aukinn.

Úkraínumenn sjálfir hafa sagt að þeir muni frelsa hvert einasta hérað Úkraínu frá Rússum og þar á meðal Krímskaga, sem Rússar innlimuðu eftir innrás þeirra árið 2014. Reyni Rússar að innlima fleiri héruð landsins myndi það alfarið gera útaf við friðarviðræður, sem hafa ekki farið fram frá því ódæði rússneskra hermanna í Bucha og öðrum byggðum norður af Kænugarði urðu ljós.

Sjá einnig: Selenskí kallar Rússa morðingja vegna fjöldagrafa

Dmítró Kúleba, utanríkisráðherra Úkraínu, sagði í dag að atkvæðagreiðslunar skiptu engu máli. Rússar hefðu hernumið hluta Úkraínu og ríkið væri í fullum rétti að verja sig og það myndu Úkraínumenn gera, sama hvað Rússar segðu.