Erlent

Vilja fleiri vopn eftir vel heppnaða gagnsókn

Samúel Karl Ólason skrifar
Úkraínskir hermenn í Kharkív-héraði.
Úkraínskir hermenn í Kharkív-héraði. AP/Kostiantyn Liberov

Vólódímír Selenskí, forseti Úkraínu, kallar eftir því að Vesturlönd útvegi ríkinu fleiri og betri vopnakerfi í kjölfar vel heppnaðrar gagnsóknar þeirra gegn Rússum í norðurhluta landsins. Forsetinn gagnrýnir Rússa fyrir að bregðast við ósigrum á vígvöllum með því að gera árásir á óbreytta borgara.

Vesturlönd hafa útvegað Úkraínumönnum mikið magn vopna, auk skotfæra og margskonar birgða frá því innrás Rússa hófst í febrúar. Það hefur gert Úkraínumönnum kleift að verjast innrásinni og reka Rússa aftur á bak í nokkrum héruðum landsins.

Ráðamenn í Kænugarði hafa þó ávallt beðið um fleiri og betri vopn og segja það bestu leiðina til að binda enda á stríðið eins fljótt og auðið er. Það er að sigra Rússa og reka þá á brott frá Úkraínu.

Innrás Rússa er ekki lokið en ljóst er að Úkraínumenn hafa unnið mikinn sigur í Kharkív sem gæti haft mikil áhrif á framvindu mála í haust og í vetur.

Í ávarpi sínu í gærkvöldi sagði Selenskí að Úkraína og Vesturlönd þyrftu að auka samstarf svo Úkraínumenn gætu unnið Rússa. Hann gagnrýndi Rússa sérstaklega fyrir að bregðast við óförum þeirra á vígvöllunum með því að gera árásir á óbreytta borgara og innviði Úkraínu.

Rússar hafa gert árásir á Kharkív-borg og önnur borgaraleg skotmörk undanfarna daga. Selenskí sagði, samkvæmt AP fréttaveitunni, að hundruð þúsunda óbreyttra borgara hefðu fundið fyrir rafmagnsleysi.

„Heimili, sjúkrahús, skólar, samkomustaðir. Staðir sem hafa ekkert með innviði hersveita okkar að gera,“ sagði Selenskí. Hann sagði þetta til marks um örvæntingu ráðamanna í Rússlandi vegna ósigurs Rússa í Kharkív. Þeir gætu ekki stöðvað Úkraínska hermenn og létu það bitna á almennum borgurum.

Úkraínumenn eru vongóðir um að velgengni þeirra undanfarnar vikur og áframhaldandi sókn gegn Rússum í suðri og austri, muni leiða til aukinna vopnasendinga frá Vesturlöndum.

Hér má sjá nýlegt myndband sem tekið var af rússneskum flugmanni yfir Úkraínu. Þar má sjá að eldflaugum var skotið að orrustuþotum Rússa.

Vopnasendinar mikilvægar

Sérfræðingar segja vopnasendingar Vesturlanda til Úkraínu hafa skipt sköpum og þá sérstaklega sendingar HIMARS-eldflaugakerfa, sem gera Úkraínumönnum kleift að gera nákvæmar árásir á skotmörk í margra tuga kílómetra fjarlægð. Þau kerfi hafa Úkraínumenn notað til fjölmargra árása á birgðanet Rússa, eins og vopna- og skotfærageymslur og stjórnstöðvar.

Eldflaugar sem hannaðar eru til að leita uppi ratsjár loftvarnarkerfa og granda þeim eru einnig sagðar hafa skipt sköpum fyrir Úkraínumenn. Þessar eldflaugar eru kallaðar HARM-eldflaugar.

Talsmaður varnarmálaráðuneytis Bandaríkjanna sagði í gær að verið væri að skoða hvort hægt væri að auka þjálfun úkraínskra hermanna, útvega Úkraínumönnum frekari loftvarnir og dróna. Samkvæmt AP fréttaveitunni er þar um bæði að ræða dróna sem hannaðir eru til eftirlits og árásardróna.

Ekki verið að ræða herkvaðningu

Áköll eftir herkvaðningu virðast hafa orðið háværari í Rússlandi. Gennady Zyuganov, leiðtogi Kommúnistaflokks Rússlands, kallaði eftir því á þingi í morgun að Rússar lýstu yfir formlegu stríði og farið yrði í almenna herkvaðningu.

Vyachelsav Volodín, forseti Dúmunnar, rússneska þingsins, gaf í skyn að heimurinn stæði frammi fyrir mikilli kjarnorkuógn vegna aðgerða Úkraínumanna, sem eiga engin kjarnorkuvopn, og að þessar aðgerðir sýndu enn og aftur hversu rétt ákvörðun það hefði verið hjá Vladimír Pútin, forseta Rússlands, að hefja „sértæku hernaðaraðgerðina“, eins og Rússar kalla innrásina.

Dmitrí Peskov, talsmaður Pútíns, sagði samkvæmt TASS fréttaveitunni, sem er í eigu rússneska ríkisins, að ekki væri verið að ræða það að fara í almenna herkvaðningu, að svo stöddu. Ekki heldur stæði til að fara í sértæka herkvaðningu, þar sem rússneski herinn gæti kallað fyrrverandi hermenn og aðra til herþjónustu.

Dmitrí Peskov, talsmaður Kreml og Pútíns.EPA/ALEXANDER ZEMLIANICHENKO

Slík herkvaðning yrði eflaust óvinsæl í Rússlandi og þar að auki er óljóst hve miklum árangri hún myndi skila Rússum í Úkraínu. Það tæki eflaust alltaf einhverja mánuði að mynda nýjar herdeildir með herkvaðningu og þjálfa þá hermenn. Þá hafa Rússar misst gífurlegt magn hergagna og sömuleiðis tæki langan tíma að útvega nýjum herdeildum vopn og skrið- og bryndreka.


Tengdar fréttir

Hörð gagnsókn Úkraínumanna virðist koma Rússum í opna skjöldu

Margir Rússar virðast nú klóra sér í höfðinu yfir verulegum árangri gagnsóknar Úkraínumanna í Kharkív en samkvæmt nýjustu stöðuuppfærslum hugveitunnar Institute for the Study of War hefur Úkraínuher náð nær öllu héraðinu aftur á sitt vald.

Gagn­rýnir frammi­stöðu rúss­neska hersins

Ramzan Kadyrov, leiðtogi Téténíu og stuðningsmaður Pútíns Rússlandsforseta, fer hörðum orðum um stjórnendur rússneska heraflans í Úkraínu vegna þess hversu miklu landsvæði þeir hafa tapað í hendur Úkraínumanna. 

Bandaríkin segja Rússa kaupa vopn frá Norður-Kóreu

Samkvæmt nýrri skýrslu frá leyniþjónustu Bandaríkjanna hafa yfirvöld í Moskvu keypt vopn fyrir milljónir dala frá Norður-Kóreu. Samkvæmt skýrslunni hafa Rússar notað bæði eldflaugar og sprengjur frá Norður-Kóreumönnum.

Segja eðlilegt að gagnsóknin gangi hægt: „Það liggur ekkert á“

Úkraínskir embættismenn segja gagnsókn þeirra í Kherson-héraði ganga hægt. Það sé þó í lagi, þar sem sóknin eigi að ganga hægt. Þeir búi hvorki yfir nægjanlegum mannafla né nægum hergögnum eins og skriðdrekum og bryndrekum til að sækja hratt fram gegn Rússum í héraðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.