Erlent

Derek Chauvin fundinn sekur um morðið á George Floyd

Samúel Karl Ólason skrifar
Lögmaðurinn Eric Nelson og skjólstæðingur hans Derek Chauvin.
Lögmaðurinn Eric Nelson og skjólstæðingur hans Derek Chauvin. AP

Kviðdómarar í Minneapolis í Bandaríkjunum hafa fundið fyrrverandi lögregluþjóninn Derek Chauvin sekan um morðið á George Floyd. Myndbönd af dauða Floyd í haldi lögreglu fóru eins og eldur í sinu um Bandaríkin og leiddu til umfangsmikilla mótmæla og jafnvel óeirða.

Chauvin var í raun ákærður fyrir morð af annarri gráðu, morð af þriðju gráðu og fyrir manndráp án ásetnings. Kviðdómarar fundu Chauvin sekan af öllum ákæruliðum en dómurinn var kveðinn upp skömmu eftir klukkan 21 að íslenskum tíma.

Réttarhöldunum sjálfum lauk í gær (mánudag) og hafa kviðdómendur verið einangraðir síðan á meðan þeir komust að niðurstöðu um það hvort sakfella ætti Chauvin eða ekki.

Chauvin, sem er hvítur, olli dauða Floyd, óvopnaðs blökkumanns, þegar hann og þrír aðrir lögregluþjónar höfðu afskipti af honum í maí í fyrra. Lögregla var kölluð til eftir að Floyd notaði falsaðan seðil í verslun.

Hann var undir áhrifum fíkniefna og neitaði að setjast upp í lögreglubílinn. Virtist hann falla í jörðina við lögreglubílinn.

Chauvin kom í kjölfarið á vettvang og hélt hann hné sínu á hálsi Floyd í um tíu mínútur. Tók hann hné sitt ekki af hálsi Floyd, jafnvel þó vegfarendur og aðrir lögregluþjónar bentu Chauvin á að Floyd væri meðvitundarlaus.

Hér að neðan má sjá tvö myndbönd. Annað sýnir aðdraganda þess að Chauvin setti hné sitt á háls Floyd og hitt var tekið af vegfaranda og sýnir hve lengi Floyd var haldið niðri.

Vert er að vara lesendur við því að myndböndin geta vakið óhug.

Á meðan réttarhöldin stóðu yfir hófust mótmæli á nýjan leik í Minneapolis og er óttast að niðurstaðan muni leiða til óeirða. Viðbúnaður lögreglu og þjóðvarðliðs hefur verið gífurlega mikill.

Rúmlega þrjú þúsund þjóðvarðliðar eru í borginni og er það til viðbótar við fjölda löggæslumanna í borginni.

Íbúar hafa lýst ástandinu á þann veg að Minneapolis hafi verið hernumin. Héraðsmiðillinn Star Tribune segir íbúa Minneapolis hafa verið á nálum í aðdraganda niðurstöðunnar og það hafi í raun ekki skipt máli hvernig niðurstaðan yrði.

Viðbúnaður lögreglu og þjóðvarðliðs hefur verið gífurlega mikill í Minneapolis.AP/John Minchillo

Joe Biden, forseti, sagði í aðdraganda úrskurðarins að hann vonaðist til þess að rétt niðurstaða fengist í málið. Án þess að hann segði það berum orðum, mátti skilja forsetann svo að hann vonaðist til þess að Chauvin yrði sakfelldur.


Tengdar fréttir

Mótmælaalda fyrir lokadag réttarhaldanna yfir Chauvin

Mótmælafundir gegn lögregluofbeldi voru víða haldnir í Bandaríkjunum um helgina en í dag er síðasti dagur réttarhaldanna yfir lögreglumanninum sem drap George Floyd á síðasta ári. Dráp hans varð til þess að til mótmæla kom um gervöll Bandaríkin.

Lögreglumaðurinn ber ekki vitni um dauða Floyd

Málsvörn Dereks Chauvin, fyrrverandi lögreglumannsins sem er ákærður fyrir að valda dauða Georges Floyd í Minneapolis í fyrra, lauk í dag án þess að hann bæri sjálfur vitni. Hann ákvað að nýta sér stjórnarskrárvarinn rétt sinn til þess að bendla sjálfan sig ekki við glæp með því að bera vitni.

Á­fram mót­mælt á götum Minnea­polis

Áfram var mótmælt á götum Brooklyn Center, úthverfi Minneapolis í Minnesota, í nótt eftir að hinn tvítugi Daunte Wright var skotinn til bana af lögreglunni á sunnudag. Að minnsta kosti sextíu mótmælendur voru handteknir í mótmælum næturinnar.

Eldfimt ástand í Minnesota

Útgöngubanni var aflétt í morgun í borginni Brooklyn Center í Minnesota í Bandaríkjunum eftir að lögreglu og mótmælendum lenti saman í nótt. Reiði ríkir á meðal borgarbúa vegna ásakana um að lögregla hafi skotið svartan karlmann til bana.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×