Erlent

Repúblikanar leita á náðir Trumps

Samúel Karl Ólason skrifar
Donald Trump og leiðtogar Repúblikanaflokksins. Uppi til vinstri er Kevin McCarthy og fyrir neðan hann er Mitch McConnell. Þeir eru leiðtogar Repúblikana í fulltrúda- og öldungadeildunum. Uppi hægra megin er svo Ronna McDaniel, formaður Landsnefndar Repúblikanaflokksins, og þar fyrir neðan er Liz Cheney, þriðji æðsti þingmaður flokksins.
Donald Trump og leiðtogar Repúblikanaflokksins. Uppi til vinstri er Kevin McCarthy og fyrir neðan hann er Mitch McConnell. Þeir eru leiðtogar Repúblikana í fulltrúda- og öldungadeildunum. Uppi hægra megin er svo Ronna McDaniel, formaður Landsnefndar Repúblikanaflokksins, og þar fyrir neðan er Liz Cheney, þriðji æðsti þingmaður flokksins. Vísir/AP/EPA

Fyrir nokkrum vikum virtist mögulegt að tangarhald Donalds Trump, fyrrverandi forseta Bandaríkjanna, á Repúblikanaflokknum væri að losna. Hann var ákærður fyrir embættisbrot öðru sinni, vegna árásar stuðningsmanna hans á þinghús Bandaríkjanna þann 6. janúar, og leiðtogar flokksins gagnrýndu forsetann opinberlega.

Í aðdraganda ákærunnar sögðust þeir til að mynda ekki ætla að þrýsta á þingmenn flokksins um að greiða atkvæði gegn því að Trump yrði ákærður og sögðu hann bera ábyrgð á árásinni að hluta til.

Sjálfur var forsetinn reiður yfir því hve lítils stuðnings hann naut og því að þingmenn og aðrir Repúblikanar vörðu hann ekki opinberlega, samhliða því að hann sagðist enga ábyrgð bera á árásinni.

Þegar Trump var svo ákærður greiddu tíu þingmenn flokksins atkvæði með ákæru.

Sjá einnig: Trump ákærður fyrir embættisbrot öðru sinni

Eins og það er orðað í umfjöllun Politico, þá virtist Trump geislavirkur.

Það var þá. Þó tiltölulega stutt sé liðið þá gerast hlutirnir oft hratt í pólitík og Repúblikanar leita nú á náðir Trumps.

Annað hljóð í kútnum

Bandamenn Trumps á þingi herja fast á þá tíu þingmenn sem greiddu atkvæði með ákæru og hafa kallað eftir því að þeim verði vikið úr Repúblikanaflokknum. Þá eru þingmenn flokksins sífellt háværari í andstöðu þeirra við ákæruna gegn Trump.

„Við þörfnumst hvers annars. Við þurfum svo sannarlega á honum og kjósendum hans að halda,“ sagði einn stjórnarmeðlimur Repúblikanaflokksins í Arkansas við Politico. Hann sagði Trump sömuleiðis þurfa á Repúblikanaflokknum að halda. Því þyrfti að leysa deilurnar í flokknum.

Annar sagði að Repúblikanaflokkurinn myndi lítið græða á því að reyna að gera Trump útlægan úr flokknum.

Þrátt fyrir að hafa í upphafi gagnrýnt Trump og aðkomu hans að árásinni á þinghúsið ætla þingmenn Repúblikanaflokksins sér að ná sáttum við hann. Mögulega vegna þess að forsetinn fyrrverandi nýtur enn mikils stuðnings meðal hefðbundinna kjósenda Repúblikanaflokksins og þess að hann ætlar að beita sér gegn þeim Repúblikönum sem hann telur óvini sína.

Fór til Flórída að lægja öldurnar

Kevin McCarthy, leiðtogi Repúblikana í fulltrúadeildinni, sagði fyrir rúmum tveimur vikum að Trump bæri að hluta til ábyrgð á árásinni og spurði aðra þingmenn hvort hann ætti að kalla eftir því að Trump segði af sér. Þá bárust fregnir af því að Trump hefði kallað hann „ræfil“ (e. pussy).

Í gær fór McCarthy þó til Flórída og leitaði stuðnings Trumps fyrir komandi kosningar.

Í kjölfar fundarins sendu þeir frá sér mynd og yfirlýsingu þar sem stóð að sameinaðir myndu þeir vinna hörðum höndum að því að tryggja Repúblikanaflokknum meirihluta í fulltrúa- og öldungadeild Bandaríkjaþings í kosningunum á næsta ári.

Samkvæmt frétt Washington Post var nokkur munur á yfirlýsingu Trumps annarsvegar og McCarthys hins vegar.

Yfirlýsingin frá Trump fjallaði um það hvað stuðningur hans væri mikilvægur Repúblikanaflokknum og að vinsældir Trumps hefðu aldrei verið meiri en nú. Sem kannanir gefa til kynna að sé rangt.

Yfirlýsing McCarthys fjallaði meira um sameiginlega baráttu Repúblikana fyrir kosningarnar á næsta ári og að tryggja flokknum fleiri sæti.

Ætlar að beita sjóðum sínum og áhrifum

Ráðgjafar Trumps hafa þegar gert ljóst að forsetinn fyrrverandi ætli að beita sér í kosningunum á næsta ári. Þá liggur fyrir að Trump situr á digrum kosningasjóðum, sem hann hefur meðal annars aflað sér í tengslum við ásakanir hans um kosningasvindl.

Sjá einnig: Fjárframlög vegna aukakosninga enda í sjóðum Trumps

Trump hefur áður sýnt fram á að hann sé hefnigjarn og hafa jafnvel verið uppi vangaveltur um að Trump stofni sinn eigin stjórnmálaflokk. Reynslan innan Repúblikanaflokksins er sú að farir þú gegn Trump, tapir þú í næsta forvali flokksins fyrir kosningar, þar sem Trump nýtur svo mikils stuðnings meðal kjósenda flokksins.

Það er meðal ástæðanna fyrir því að Repúblikanar vilja ná sáttum við Trump en í sama mund halda honum í hæfilegri fjarlægð.

Reyna að ná til kjósenda í gegnum Trump

AP fréttaveitan segir að þó tak Trumps á Repúblikanaflokknum sé sterkt sé það ekki jafn sterkt og áður. Hann hafi einangrast töluvert frá því hann lét af embætti og þá meðal annars vegna þess að samfélagsmiðlafyrirtæki hafa lokað á hann vegna árásarinnar á þingið.

Þá hefur Trump ekki sést opinberlega frá því hann mætti til Flórída í síðustu viku og hefur varið tíma sínum með bandamönnum og ráðgjöfum vegna réttarhaldanna sem fara munu fram í öldungadeildinni á næstunni.

Kannanir hafa sýnt að stór hluti kjósenda Repbúlikanaflokksins telji sig frekar stuðningsmenn Trumps en stuðningsmenn flokksins. Einn viðmælandi AP fréttaveitunnar sagði að í rauninni væru Repúblikanar ekki að daðra við Trump, heldur kjósendur hans.

„Ég held að Trump hafi skilið eftir sig stærðarinnar tómarúm,“ sagði Alex Conant, sem vinnur innan Repúblikanaflokksins. Hann sagði Trump hafa skilið eftir sig stærðarinnar tómarúm. Í fjögur ár hafi Repúblikanaflokkurinn í raun verið Trumpflokkurinn.

Stóra spurningin sé hvort Trump muni takast að halda áhrifum sínum á flokknum á sama tíma og hann sé ekki í sviðsljósinu.

Frá árásinni á þinghúsið þann 6. janúar. Markmið fólksins sem réðst á þinghúsið var að stöðva formlega staðfestingu á niðurstöðum forsetakosninganna í nóvember.Getty/Lev Radin

Deila um ábyrgð Trumps og þingmanna

Trump er í raun ákærður fyrir að hvetja til uppreisnar og snýr sérstaklega að hlutverki forsetans í því að æsa fólk upp, sem á endanum braut sér leið inn í þinghús Bandaríkjanna þann 6. janúar, með því markmiði að stöðva formlega staðfestingu úrslita forsetakosninganna í nóvember.

Eftir að Trump og bandamenn hans í Repúblikanaflokknum, þar á meðal þingmenn á báðum deildum Bandaríkjaþings, staðhæfðu ítrekað og lengi yfir því að umfangsmikið kosningasvindl hefði kostað Trump sigur, stóðu stuðningsmenn hans í þeirri trú að svo væri og gera enn.

Engar vísbendingar hafa þó litið dagsins ljós um þetta umfangsmikla kosningasvindl og Trump-liðum hefur ítrekað mistekist að færa sönnur fyrir því fyrir dómstólum og víðar.

Þingmenn Repúblikanaflokksins hafa verið sakaðir um að ýta einnig undir árásina á þingið með því að hafa staðið við bakið á Trump og dreift einnig áskönunum hans um kosningasvindl.

Leiðtogar Demókrataflokksins segja nauðsynlegt að refsa Trump vegna árásarinnar og segja að ef það verði ekki gert, geti aðrir forsetar gert það sem þeim sýnist á síðustu dögum forsetatíðar þeirra.

Undanfarna daga hafa Repúblikanar þó haldið því fram að mögulega fari það gegn stjórnarskrá Bandaríkjanna að rétta yfir fyrrverandi forseta fyrir meint embættisbrot og segja að Demókratar séu eingöngu að reyna að ná sér niður á Trump.

Washington Post segir miklar deilur eiga sér nú stað í fulltrúadeildinni. Þingmenn Demókrataflokksins segji samstarfsmönnum sínum í Repúblikanaflokknum ekki treystandi og vísa til þess að einhverjir þeirra hafi á undanförnum vikum reynt að bera skotvopn í þingsal, sem er gegn reglum þingsins.

Þá eru einhverjir Demókratar sagðir hafa keypt sér skotheld vesti.

Nancy Pelosi, forseti fulltrúadeildarinnar.EPA/MICHAEL REYNOLDS

Til marks um þessar deilur á þinginu sagði Nancy Pelosi, forseti fulltrúadeildarinnar, á blaðamannafundi á fimmtudaginn að „óvinurinn“ væri í fulltrúadeildinni og að þingmenn hefðu áhyggjur.

Þá sakaði þingkonan Alexandria Ocasio-Cortez öldungadeildarþingmanninn Ted Cruz, sem er ötull stuðingsmaður Trumps, um að hafa reynt að láta myrða sig. Vísaði hún þar til aðkomu Cruz að árásinni á þingið en hann er einn þeirra bandamanna Trumps sem hafa staðhæft að kosningasvindl hafi kostað Trump sigur í forsetakosningunum í nóvember.


Tengdar fréttir

Aðeins fimm repúblikanar greiddu atkvæði á móti frávísun

Afar ólíklegt verður að teljast að Donald Trump verði fundinn sekur í öldungadeild bandaríska þingsins þegar ákærur á hendur honum verða teknar fyrir. Meirihluti þingmanna repúblikana greiddu í dag atkvæði með tillögu um að vísa ákærunum frá.

Af­hentu öldunga­deildinni á­kæruna á hendur Trump

Þingmenn úr fulltrúadeild Bandaríkjaþings afhentu í gær öldungadeildarþingmönnum ákæruna á hendur Donald Trump, fyrrverandi forseta, sem samþykkt var í fulltrúadeildinni fyrir tveimur vikum, á meðan Trump var enn í embætti.

Sagður hafa skipu­lagt hefndir gegn sam­flokks­mönnum sem sviku hann

Donald Trump fyrrverandi Bandaríkjaforseti er sagður hafa eytt helginni í að skipuleggja hvernig hann geti náð þingsætum af þeim repúblikönum sem honum þykir hafa svikið sig. Trump flaug til Flórídaríkis á miðvikudag, sama dag og Joe Biden var settur í embætti forseta.

Vildi sinn mann í ráðherrastól á síðustu metrunum

Donald Trump, fyrrverandi forseti Bandaríkjanna, íhugaði að skipta út starfandi dómsmálaráðherra Bandaríkjanna í upphafi mánaðarins. Ætlaði hann sér að skipa annan starfandi ráðherra sem átti að hjálpa honum við að snúa niðurstöðum forsetakosninganna í fyrra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.