Ígildi íslensku þjóðarinnar liggur í valnum

Samkvæmt Hagstofu íslands voru Íslendingar alls 364 þúsund talsins þann 1. janúar í fyrra. Ekki er búið að gefa út nýjar tölur enn.

Gærdagurinn var sá banvænasti vestanhafs frá því faraldur nýju kórónuveirunnar hófst og var það í fyrsta sinn sem fleiri en fjögur þúsund Bandaríkjamenn dóu vegna Covid-19, sjúkdómsins sem kórónuveiran veldur. Alls dóu 4.085 í gær, samkvæmt opinberum tölum.

Í heildina hafa rúmlega 21,5 milljón manna smitast af Covid í Bandaríkjunum. Sérfræðingar segja að þó bólusetningar séu byrjaðar, séu mánuðir þar til nægilega margir hafi verið sprautaðir til að draga úr dreifingu veirunnar.

Í frétt CNN er vísað í spálíkön þar sem fram kemur að allt að 115 þúsund manns gætu dáið til viðbótar á næstu fjórum vikum.

Ástandið er sérstaklega slæmt í Kaliforníu þar sem rúmlega þúsund manns hafa dáið á tveimur dögum. Í Los Angeles sýslu deyr einhver úr Covid-19 á nítján mínútna fresti.

Þeim fer einnig hratt fjölgandi sem deyja í Brasilíu og hafa nú rúmlega tvö hundruð þúsund manns dáið þar í landi, svo vitað sé. Látnum fjölgaði um 1.524 á milli daga og er heildartalan nú í 200.498, samkvæmt AP fréttaveitunni.