Liverpool hefur fengið Kostas Tsimikias, Thiago Alcantara og Diogo Jota í sumarglugganum. Samanlagt kostuðu þessir leikmenn um 75 milljónir punda.

Thiago kom frá Evrópumeisturunum í Bayern Munchen, Tsimikas frá Olympiakos og Jota kemur frá Wolves þar sem hann hefur gert ansi góða hluti undanfarin ár.

France Football, dagblaðið í Frakklandi, greindi frá því að Liverpool hefði áhuga á því að fá Ismaila Sarr frá Watford og Ousmane Dembele frá Barcelona en það ku ekki vera rétt.

Liverpool Echo, staðarblaðið í Bítlaborginni, segir að Liverpool hafi lokið þeim viðskiptum sem þeir ætluðu sér að gera í sumar hvað varðar innkaup en einhverjir gætu hins vegar farið frá félaginu.

Rhian Brewster og Marko Grujic gætu verið á leið frá félaginu og sömu sögu má segja af þeim Xherdan Shaqiri og Harry Wilson. Loris Karus og Ben Woodburn eru einnig sagðir fáanlegir fyrir rétt verð.