Enski boltinn

Lampard vill stokka upp í leikmannahópi Chelsea

Runólfur Trausti Þórhallsson skrifar
Lampard stefnir á miklar breytingar á leikmannahópi Chelsea í sumar.
Lampard stefnir á miklar breytingar á leikmannahópi Chelsea í sumar. EPA-EFE/WILL OLIVER

Frank Lampard, núverandi þjálfari og fyrrum leikmaður enska knattspyrnufélagsins Chelsea, hefur fengið grænt ljós frá eiganda liðsins, rússneska auðjöfrinum Roman Abramovich, til að styrkja liðið til muna þegar félagaskiptaglugginn opnar á nýjan leik í sumar.

Chelsea hefur eytt litlu í leikmenn undanfarin ár ásamt því að félaginu var bannað að kaupa leikmenn eftir að hafa brotið félagaskiptareglur Alþjóðaknattspyrnusambandsins, FIFA. Þá var landvistarleyfi Abramovich ekki endurnýjað fyrir tveimur árum og var talið að áhugi Rússans færi dvínandi.

Íþróttamiðillinn The Athletic greinir frá en samkvæmt heimildum þeirra er Ben Chilwell, vinstri bakvörður Leicester City, helsta skotmark Chelsea í sumar. Að því sögðu þarf félagið þá að selja annan af tveimur vinstri bakvörðunum sem eru nú þegar hjá félaginu.

Hinn ítalski Emerson hefur verið orðaður við Ítalíumeistara Juventus og þá er óljóst hvort Marcos Alonso hafi áhuga að vera hjá félaginu ef hann ætti ekki fast sæti í byrjunarliðinu.

Juventus ku einnig vera á höttunum á eftir miðjumanninum Jorginho og þá hefur framtíð markvarðarins Kepa Arrizabalaga verið til umræðu en Lampard virðist ekki hafa mikla trú á Spánverjanum sem kostaði rúmlega 70 milljónir punda fyrir aðeins tveimur árum.

Chelsea situr sem stendur í 4. sæti ensku úrvalsdeildarinnar en hún fer aftur af stað eftir rétt rúmar tvær vikur eða þann 17. júní. Mikilvægt er fyrir félagið að ná Meistaradeildarsæti til að geta fengið til sín þá leikmenn sem Lampard vill fá.

Ljóst er að Lampard getur dýft sér í digra sjóði félagsins en það fjármagn sem kom inn fyrir Eden Hazard og Alvaro Morata síðasta sumar – ríflega 140 milljónir punda – mun að mestu fara í nýja leikmenn.

Tveir af launahærri leikmönnum liðsins, vængmennirnir Willian og Pedro, renna út á samning í sumar og virðist sem þeir fái ekki nýja samninga á Stamford Bridge. Félagið hefur nú þegar staðfest komu Hakim Ziyech frá Ajax en hann mun ganga til liðs við Chelsea í sumar.

Það er ljóst að leikmannahópur Chelsea mun taka stakkaskiptum í sumar en félagið er orðað við leikmenn á borð við Kai Havertz [Bayer Leverkusen], Jadon Sancho [Borussia Dortmund], Moussa Dembele [Lyon] og Timo Werner [RB Leipzig] ásamt Ben Chilwell.

Allir þessir leikmenn eru ungir að árum og virðist sem Lampard sé að reyna minnka meðalaldur leikmannahóps síns.


Tengdar fréttir

Mainz bað Klopp um að kaupa Werner strax

Twitter-síða þýska úrvalsdeildarliðið Mainz sló á létta strengi eftir að Timo Werner skoraði þrjú mörk gegn þeim um helgina en þetta er í annað skiptið á stuttum tíma sem Werner gerði Mainz lífið leitt.

Kante æfði ekki með Chelsea í dag af ótta við veiruna

Það var enginn N’Golo Kante sjáanlegur á æfingu Chelsea í dag og Matt Law, blaðamaður á The Telegraph, segir að það eigi sér eðlilega skýringu. Hann hafi fengið frí frá æfingu dagsins og óvíst hvenær hann æfir aftur með liðinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.