Sturridge stígur úr skugga Suárez

Það var morgunljóst frá stundinni þegar Liverpool seldi Luis Suárez til Barcelona fyrr í sumar að það yrði erfitt verkefni fyrir Brendan Rodgers, knattspyrnustjóra liðsins, að finna staðgengil hans.

Liðið var ekki bara að missa markahæsta leikmann liðsins undanfarin tvö ár heldur einnig leikmann sem hafði óbilandi sigurvilja og dreif liðið oft áfram. Það efast enginn um hæfileika Luis Suárez en stuðningsmenn Liverpool geta þó andað léttar þar sem ólíklegt er að allur kraftur fari úr sóknarleik liðsins.

Ábyrgðin fer úr höndum Suárez í hendur ensku landsliðsmannanna Daniels Sturridge og Raheems Sterling og brasilíska töframannsins Philippes Coutinho. Liverpool hefur keypt skapandi leikmenn á borð við Adam Lallana og Lazar Markovic í sumar en ljóst er að til þess að Liverpool geti gert atlögu að enska titlinum í ár þurfa þessir þrír piltar að taka liðið á herðar sér.

Raheem Sterling skaust inn í sviðsljósið með góðri frammistöðu á seinni hluta síðasta tímabils. Miklar væntingar voru gerðar til Sterlings er hann gekk til liðs við Liverpool frá QPR aðeins fimmtán ára gamall. Hann sýndi oft lipra takta í upphafi ferils síns hjá Liverpool en tókst ekki að taka næsta skref og verða að þeim gæðaleikmanni, sem hann er í dag, fyrr en undir lok ársins 2013.

Skoraði níu mörk og lagði upp önnur sjö á síðasta tímabili en þarf að bæta við í fjarveru Suárez. Eldfljótur, nautsterkur og teknískur leikmaður sem gæti stimplað sig inn í hóp þeirra bestu standi hann sig í stykkinu í vetur.

Coutinho hefur stjórnað umferðinni hjá Liverpool allt frá því að hann kom frá Inter árið 2012. Gríðarlega leikinn með boltann, les leikinn vel og á auðvelt með að skapa sér pláss en akkillesarhæll hans hefur verið markaskorun.

Honum hefur ekki tekist að bæta markaskorun við leik sinn en hefur litið vel út á undirbúningstímabilinu og gæti verið tilbúinn til þess að taka næsta skref sem leikmaður á stóra sviðinu.

Daniel Sturridge hefur þurft að standa í skugga annarra leikmanna allan sinn feril en nú er loksins komið að stóra tækifærinu. Getur hann sannað sig sem framherji sem getur leitt lið að titlum?

Uppalinn hjá Manchester City, fékk fá tækifæri hjá Chelsea og féll í skugga Suárez hjá Liverpool þrátt fyrir að eiga frábært tímabil. Fær loksins tækifærið til að axla ábyrgð sem aðalframherji liðs en hann stóð sig vel í þau fáu skipti sem Liverpool spilaði án Suárez á síðustu 18 mánuðum.

Nái þessir þrír leikmenn að taka næsta skref skyldi enginn útiloka að Liverpool berjist um titilinn í ár og ljóst er að þrátt fyrir að Úrúgvæinn magnaði sé farinn er sókn Liverpool alls ekki bitlaus.

Tólf síðna sérblað um ensku úrvalsdeildina fylgir helgarblaði Fréttablaðsins á morgun. Í blaðinu er meðal annars rætt við Gylfa Þór Sigurðsson, leikmann Swansea, Grétar Rafn Steinsson fjallar um fyrrverandi læriföður sinn, Louis van Gaal, og fjallað er um sóknarlínu Liverpool eftir brotthvarf Luis Suárez svo fátt eitt sé nefnt.  Ekki missa af því.   

Stöð 2 Sport 2 sýnir 380 beinar útsendingar frá Enska boltanum á komandi tímabili. Net og heimasími fylgir með Enska pakkanum. Fáðu þér áskrift á 365.is