Guardiola: Leikmenn United vilja vinna sama hvað stuðningsmennirnir segja

Pep Guardiola hefur ekki trú á því að leikmenn Manchester United muni hlusta á stuðningsmenn liðsins fyrir stórleikinn við Manchester City í kvöld.

Stórleikur Manchesterliðanna í kvöld verður að öllum líkindum leikurinn sem ræður því hvort Liverpool eða Manchester City verður Englandsmeistari.

Liverpool er á toppnum með 88 stig og 35 leiki spilaða. Manchester City er í öðru sæti með 86 stig og 34 leiki spilaða. Leikurinn sem City á inni er leikurinn gegn United í kvöld.

Liverpool á eftir leiki gegn botnliði Huddersfield, útileik gegn Newcastle og klárar tímabilið á heimaleik gegn Wolves. City á eftir útileik gegn Burnley, heimaleik gegn Leicester og útileik gegn Brighton á lokadeginum.

Toppliðin í deildinni eiga að geta unnið alla þessa leiki án mikilla vandræða, þó enska úrvalsdeildin hafi sýnt það í gegnum tíðina að allir geti unnið alla.

Þessi staða hefur sett marga stuðningsmenn Manchester United í erfiða stöðu. Þeir vilja að sjálfsögðu sjá sitt lið vinna, hvað þá grannaslagi við bláu nágrannana sem hafa tekið sviðsljósið síðustu ár, en í huga margra er Liverpool meiri óvinur heldur en Manchester City. Þess vegna hafa sumir stuðningsmenn United sagt að þeir vilji taka á sig tap fyrir City til þess að koma í veg fyrir að Liverpool fagni titlinum.

„Ég skil stuðningsmennina. Þegar ég hugsa um Barcelona og Real Madrid eða aðra stóra fjendur þá er þetta eðlilegt,“ sagði Pep Guardiola, knattspyrnustjóri Manchester City.

„En stuðningsmennirnir geta sagt hvað sem þeir vilja, þeir spila ekki leikinn. Leikmennirnir gera það og þeir vilja alltaf vinna og skila góðri frammistöðu.“

Það er ekki eins og leikurinn sé tilgangslaus fyrir Manchester United, að öðru leiti en að setja stein í götu erkifjendanna, liðið er í harðri baráttu um Meistaradeildarsæti og var niðurlægt af Everton um síðustu helgi.

„Þeir munu vilja bregðast við tapinu. Þeir eru mannlegir, þeir eru atvinnumenn og þeir eru stoltir.“

„Ég hef bara verið þrjú ár hér svo ég þekki sögu Manchester City ekki það vel en það er aldrei auðvelt að fara á Old Trafford og það verður ekkert öðruvísi núna.“

Leikur Manchester United og Manchester City hefst klukkan 19:00 í kvöld og er í beinni útsendingu á Stöð 2 Sport.