American Airlines framlengir kyrrsetningu MAX 8
Flugfélagið American Airlines hefur ákveðið að framlengja kyrrsetningu Boeing 737 MAX 8 véla félagsins fram yfir sumartímann og fara þær því í loftið í fyrsta lagi um miðjan ágúst. BBC greinir frá.
Ákvörðunin var tekin með það í huga að efla traust viðskiptavina til flugfélagsins yfir háannatíma sumarsins. Ráðamenn innan fyrirtækisins segjast hafa trú á því að uppfærsla Boeing á stýrikerfi vélanna verði samþykkt fyrir 19. ágúst þrátt fyrir ákvörðun um að kyrrsetja tuttugu og fjórar vélar fram að því.
Áætlað er að ákvörðunin muni hafa áhrif á allt að 115 flug daglega samkvæmt Reuters en önnur flugfélög á borð við Southwest Airlines og United Airlines hafa tekið samskonar ákvarðanir og munu kyrrsetja sínar vélar í það minnsta fram að júnímánuði.
Umræddar vélar hafa verið mikið til umræðu eftir að tvær Boeing 737 MAX 8 vélar fórust með fimm mánaða millibili og eru slysin rakin til galla í hugbúnaði vélanna sem á að koma í veg fyrir ofris. Alls létust 346 manns í slysunum.
Tengdar fréttir
Vill að Boeing endurskoði stjórnkerfi flugvéla
Eþíópía hefur gefið út bráðabirgðaniðurstöður rannsóknar á slysinu þar sem fram kemur að flugmennirnir hafi fylgt neyðarleiðbeiningum Boeing en hafi þrátt fyrir það ekki náð stjórn á vélinni.
Leiðbeiningar Boeing komu ekki í veg fyrir slysið
Sjálfstýring Boeing-vélarinnar sem fórst í Eþíópíu virðist hafa kveikt á sér þó að flugmennirnir hafi fylgt leiðbeiningum um að slökkva á henni.
Hrópaði "Hífðu upp! Hífðu upp!“ þegar flugvélin hrapaði
Erlendir fjölmiðlar hafa í dag fjallað um hinstu samskipti flugmannanna sem stýrðu Boeing-farþegaþotu flugfélagsins Ethiopian Airlines, sem fórst fyrr í þessum mánuði.
