Tíu ár frá draumafrumraun Macheda

Í dag, 5. apríl 2019, eru tíu ár síðan Federico Macheda skaust upp á stjörnuhimininn þegar hann skoraði sigurmark Manchester United gegn Aston Villa í sínum fyrsta leik fyrir aðallið félagsins. Markið kom á mikilvægum tíma og skipti sköpum í baráttunni um Englandsmeistaratitilinn.

Fáir kunnu deili á Macheda þegar Sir Alex Ferguson setti þennan 17 ára Ítala inn á fyrir Nani eftir rúman klukkutíma í leik United og Villa á Old Trafford sunnudaginn 5. apríl 2009. United hafði tapað tveimur leikjum í röð og var 1-2 undir á móti Villa. Daginn áður hafði Liverpool minnkað forskot United á toppi ensku úrvalsdeildarinnar niður í eitt stig með 0-1 útisigri á Fulham og því var staða Ferguson og félaga viðkvæm.

Ronaldo jafnaði fyrir United á 81. mínútu með sínu öðru marki í leiknum. Og þegar þrjár mínútur voru komnar fram yfir venjulegan leiktíma var röðin komin að Macheda.

Hann fékk boltann frá Ryan Giggs, sneri skemmtilega með boltann og skrúfaði hann svo í fjærhornið framhjá Brad Friedel í marki Villa. Macheda ærðist af fögnuði sem og allir stuðningsmenn United.

 

Just listen to that roar#OnThisDay 10 years ago, Federico Macheda scored the winner against Villa!pic.twitter.com/WAKhrXMyoH

— Manchester United (@ManUtd) April 5, 2019

Eftir þennan dramatíska sigur leit United aldrei í baksýnisspegilinn. Þeir fóru á mikið flug, unnu næstu sex deildarleiki og eftir markalaust jafntefli við Arsenal í næstsíðustu umferðinni var átjándi Englandsmeistaratitilinn í höfn. United jafnaði þar með titlafjölda Liverpool.

Hvað Macheda varðar skoraði hann í næsta deildarleik United, 1-2 sigri á Sunderland, og kom við sögu í nokkrum leikjum það sem eftir lifði tímabils.

Ítalanum tókst þó engan veginn að fylgja frumrauninni ótrúlegu eftir. Hann skoraði aðeins þrjú mörk fyrir United eftir tímabilið 2008-09 og var lánaður til fjölmargra félaga á næstu árum.

Macheda átti erfitt uppdráttar nánast alls staðar þar sem hann fór og ferilinn, sem byrjaði svo vel, fór aldrei almennilega af stað.

Macheda yfirgaf United þegar samningur hans rann út sumarið 2014. Ole Gunnar Solskjær, fyrrverandi þjálfari hans í varaliði United og núverandi þjálfari aðalliðsins, fékk sinn gamla leikmann til Cardiff City. Þar gat sá ítalski lítið og skoraði aðeins átta mörk í 33 leikjum fyrir velska liðið.

Í dag leikur hinn 27 ára Macheda með Panathinaikos í Grikklandi. Hann hefur skorað átta mörk í 24 leikjum með liðinu.