Peningarnir streyma frá Liverpool til umboðsmannanna

Liverpool borgaði umboðsmönnum langmest af öllum liðunum í ensku úrvalsdeildinni á síðasta ári.

Alls fóru 43,8 milljónir punda frá Liverpool til umboðsmanna en það eru 6,9 milljarðar í íslenskum krónum.

Liverpool borgaði umboðsmönnum sautján milljón punda meira en næsta félag sem var Chelsea með 26,8 milljónir punda. Næstu liðin á eftir voru síðan Manchester City með 24,1 milljón punda og Manchester United með 20,8 milljónir punda.

 

Liverpool paid agents £43.8m last year – £17m more than any other Premier League team. By @seaninglehttps://t.co/wetfJmM2vG

— Guardian sport (@guardian_sport) April 4, 2019

Alls borguðu öll úrvalsdeildarfélögin umboðsmönnum 260,6 milljónum punda frá febrúar 2018 til janúar 2019. Með því rústuðu þeir gamla metinu sem var 211 milljónir árið á undan.

Liverpool eyddi stórum upphæðum í nýja leikmenn á síðasta ári en þeir sóttu menn eins og Alisson, Naby Keïta, Fabinho og Xherdan Shaqiri fyrir 2018-19 tímabilið.

Liverpool borgaði umboðsmönnum átján milljónum punda meira á síðasta ári en árið á undan þegar félagið sótti Virgil van Dijk, Mohamed Salah, Alex Oxlade-Chamberlain og Andrew Robertson.

Enska knattspyrnusambandið gefur ekki út sundurliðun á því hvað hver og einn umboðsmaður er að fá í tekjur í gegnum félagsskipti skjólstæðinga þeirra.

Þetta nýja met og mikil aukning á greiðslum til umboðsmanna undanfarin ár hefur samt aukið pressuna á því að það verði tekið á þessum ofurtekjum umboðsmanna knattspyrnumanna.