Stjörnunni og ÍBV tókst ekki að færa sér mistök Þórs/KA í nyt | Myndir

Stjarnan og ÍBV skildu jöfn, 2-2, á Samsung-vellinum í Pepsi-deild kvenna í kvöld. Bæði lið eru væntanlega súr að hafa ekki náð að nýta sér það að Þór/KA náði aðeins jafntefli gegn Fylki fyrir norðan á sama tíma.

Kristín Erna Sigurlásdóttir kom ÍBV yfir á lokamínútu fyrri hálfleiks með sínu sjötta marki í sumar.

Í seinni hálfleik tók Katrín Ásbjörnsdóttir málin í sínar hendar. Hún jafnaði metin á 53. mínútu og 16 mínútum fyrir leikslok kom hún Stjörnunni yfir með marki úr vítaspyrnu. Katrín er nú komin með 12 mörk í 13 deildarleikjum í sumar.

Þegar mínúta var til leiksloka fékk ÍBV víti eftir að boltinn fór í hönd Kim Dolstra og Andri Vigfússon, dómari leiksins, dæmdi vítaspyrnu. Landsliðskonan Sigríður Lára Garðarsdóttir fór á punktinn og skoraði af öryggi. Lokatölur 2-2.

Stjarnan er í 2. sæti deildarinnar með 27 stig, einu stigi meira en ÍBV sem er í sætinu fyrir neðan.

Upplýsingar um úrslit og markaskorara eru fengnar frá Fótbolta.net.

Andri Marinó Karlsson, ljósmyndari Fréttablaðsins og Vísis, var á Samsung-vellinum í kvöld og tók meðfylgjandi myndir.