Van Dijk biður um sölu frá Southampton

Virgil van Dijk, varnarmaður Southampton í ensku úrvalsdeildinni, hefur beðið um sölu frá félaginu.

Van Dijk sem gekk til liðs við Southampton árið 2015 frá Celtic, hefur verið orðaður við brottför frá liðinu í allt sumar.

Lítið hefur gerst í hans málum undanfarið en þó hafa nokkur lið borið víurnar í varnarmanninn en nú hefur Hollendingurinn beðið um sölu frá félaginu.

Talið var að van Dijk væri á leiðinni til Liverpool en Jurgen Klopp, þjálfari Liverpool, lét hafa eftir sér á dögunum að lið hans þyrfti ekki á varnarmanni að halda þannig óljóst er hvert að van Dijk fari, en hann hefur gefið það út að hann vilji leika með liði sem spilar í Evrópukeppni.

Van Dijk hefur spilað 55 leiki fyrir Southampton og skorað 4 mörk ásamt því að hafa leikið 12 landsleiki fyrir Holland.