Sky Sports: Gylfi fær ekki fyrirsagnirnar en er líklega vanmetnastur í deildinni

„Swansea er hættulega nálægt fallsvæðinu en stjarna Gylfa Sigurðssonar skín skært þrátt fyrir mótlætið. Á miðjumaðurinn meiri viðurkenningu skilið?“

Svona hefst úttekt enska fréttamannsins og fótboltasérfræðingsins Nick Wright um Gylfa Þór Sigurðsson, leikmann Swansea í ensku úrvalsdeildinni. Gylfi er maðurinn sem heldur Swansea á floti og er sagður í úttektinni vera mögulega sá vanmetnasti í allri úrvalsdeildinni.

Sjá einnig:Enginn miðjumaður í ensku úrvalsdeildinni býr til fleiri mörk en Gylfi Þór

Gylfi Þór skoraði í þriðja leiknum í röð um síðustu helgi þegar Swansea tapaði á móti Manchester City, 2-1. Hann var í tveimur leikjum á undan búinn að skora sigurmark en í heildina hefur hann komið að fimmtán mörkum með beinum hætti (8 mörk, 7 stoðsendingar) fyrir Swansea á tímabilinu.

Hann er í sjöunda sæti á listanum yfir þá sem hafa skapað flest mörk í deildinni á eftir framherjum eins og Diego Costa og Zlatan Ibrahimovic en Gylfi Þór er efstur miðjumanna á þessum lista. Enginn miðjumaður í ensku úrvalsdeildinni hefur búið til fleiri mörk en Gylfi. Næstir á eftir honum koma Adam Lallana hjá Liverpool og Tottenham-mennirnir Christian Eriksen og Dele Alli.

Sjá einnig:Gylfi: Aldrei minn vilji að fara

„Í miðri fallbaráttu og undir stjórn þriggja knattspyrnustjóra er Gylfi Þór búinn að skora tvöfalt fleiri mörk en Kevin De Bruyne og gefa tvöfalt fleiri stoðsendingar en Eden Hazard. Það er erfitt að fá sömu viðurkenningu og þannig leikmenn þegar þú spilar fyrir lið í fallbaráttu en fáir leikmenn eru jafn mikilvægir sínum liðum,“ segir í úttektinni.

Gylfi Þór er í öðru sæti yfir mörk skoruð fyrir utan teig í úrvalsdeildinni frá upphafi leiktíðar 2014/2015 með níu stykki. Christian Eriksen er á toppnum með tíu en Gylfi var óheppinn að skora ekki beint úr aukaspyrnu á móti City um helgina.

„Það er engin furða að Paul Clement líki honum við Frank Lampard. Stjóri Swansea hefur eytt drjúgum hluta ferilsins hjá stórum félögum eins og Chelsea, PSG, Real Madrid og Bayern og í síðustu viku sagði hann að þessi 27 ára gamli leikmaður gæti spilað með þeim öllum,“ segir í úttektinni um Gylfa.

Sjá einnig:Gylfi skoraði í sjötta mánuðinum í röð

Hafnfirðingurinn er ekki bara góður í fótbolta heldur er hann líka duglegri en allir í Swansea-liðinu og tölfræðin sannar það. Gylfi hefur tekið flesta spretti í þrettán leikjum velska liðsins það sem af er á leiktíðinni. Enginn samherja hans er nálægt íslenska landsliðsmanninum. Þá hefur Gylfi hlaupið meira tólf kílómetra í þremur af síðustu fjórum leikjum.

„Það eru ekki margir heilsteyptari miðjumenn en Gylfi í efri helmingi deildarinnar og hvað þá þeim neðri. Gylfi fær kannski ekki fyrirsagnirnar eins og Gabriel Jesus en fyrir Swansea gæti hann orðið það sem skilur á milli falls og þess að halda sér í deildinni,“ segir í greininni á Sky.

Alla úttekina má lesa hér.