Arsenal sagt hafa krækt í samherja Birkis hjá Basel

Daily Mail greinir frá því í morgun að Arsenal sá að ganga frá kaupum á Mohamed Elneny, miðjumanni svissnesku meistaranna í Basel. Elneny er þar samherji Birkis Bjarnasonar.

John Cross, blaðamaður Daily Mail, segir frá því að Arsenal hafi náð samkomulagi við Basel um Elneny. Kaupverðið er talið vera í kringum fimm milljónir punda og verður líklega einu kaup Arsenal í glugganum að sögn Cross.

Einhverjir stuðningsmenn Arsenal hafa kallað eftir að liðið styrki sig í glugganum, en voru eflaust að vonast eftir stærra nafni en Elneny.

Elneny er 23 ára gamall miðjumaður sem hefur spilað 39 leiki fyrir Egyptaland. Hann hefur spilað sextán af átján leikjum Basel í svissnesku úrvalsdeildinni í ár og skorað í þeim tvö mörk.

Arsenal er í harðri toppbaráttu á Englandi, en liðið er í öðru sæti deildarinnar, tveimur stigum á eftir Leicester. Arsenal mætir Southampton í kvöld og hefst leikurinn klukkan 20.00. Hann er í beinni útsendingu á Stöð 2 Sport 2/HD.