Bað Fabregas afsökunar

Pat Nevin, fyrrum leikmaður Chelsea og sérfræðingur á BBC, hefur beðið Cesc Fabregas afsökunar á ummælum sem hann lét falla í útvarpsþætti á stöðinni í síðustu viku.

Sjá einnig: Fabregas íhugar lögsókn

Fyrr í vetur var fullyrt að leikmaður Chelsea myndi frekar vilja tapa leikjum en að vinna þá undir stjórn Jose Mourinho, sem var í síðustu viku rekinn frá félaginu.

Fréttin var fyrst sögð í þessum sama útvarpsþætti af stjórnandanum Garry Richardson sem nafngreindi þó aldrei umræddan leikmann. Fréttin var hins vegar tekin upp af öðrum fjölmiðlum og bárust böndin fljótt að Fabregas.

„Já, þetta var Fabregas, var það ekki?“ sagði Nevin þegar fréttin var rifjuð upp í síðustu viku. Ummælin fóru illa í Spánverjann sjálfan sem var í gær sagður íhuga að fara í málsókn vegna þeirra.

Sjá einnig: Leikmaður Chelsea: Myndi frekar tapa en að vinna fyrir Mourinho

Nevin hefur nú brugðist við með því að biðjast innilegar afsökunar á orðum sínum. Segist hann hafa talið að það hafi þegar komið fram að umræddur leikmaður hafi verið Cesc Fabregas og að hann hafi í raun verið að spyrja spurningar, fremur en að bendla Fabregas viljandi við fréttina.

„Þetta var allt saman misskilningur en ég biðst engu að síður afsökunar,“ sagði Nevin meðal annars í yfirlýsingu sinni.