Silva: Aldrei kynnst eins mikilli ástríðu eins og á Englandi

David Silva, leikmaður Manchester City, segir að ástríðan á Englandi sé eitthvað sem hann hafi aldrei kynnst áður.  Uppáhaldsstoðsending Silva kom í 6-1 sigri Manchester City á grönnunum í United.

„Ástríðan hér er eitthvað sem ég hafði ekki upplifað áður. Það er þvílík ástríða á hverjum leikvangi hér hverja einustu viku,” sagði Silva í samtali við Soccer AM, en Silva spilaði á Spáni áður en hann kom til Englands.

„Ég held að hér áður fyrr hafi liðin hér verið meira að spila kraftabolta, en nú vilja liðin spila sóknarbolta og halda boltanum innan liðsins. Það er eitthvað sem mér líkar mjög vel við.”

Silva hefur verið verið gífurlega mikilvægur liði Manchester City undanfarin ár. Hann hefur unnið tvo Englandsmeistaratitla, enska bikarinn og deildarbikarinn. Hann á einnig félagsmetið yfir flestar stoðsendingar í einum leik, en hans uppáhalds stoðsending kom í 6-1 sigrinum á Manchester United í október 2011.

„Uppáhaldsstoðsendingin mín var sendingin á Edin Dzeko þegar hann skoraði gegn Manchester United. Það er mín uppáhalds, en auðvitað eru þær fleiri. Ég skoraði mitt fyrsta mark gegn Blackpool. Ég byrjaði á bekknum, kom inná og náði að skora. Það gaf mér mikið sjálfstraust,” sagði Silva.

Manchester City mætir Sunderland klukkan 15.00, en leikurinn er í þráðbeinni útsendingu hliðarrásum Stöðvar 2 Sports.