Eigandi Leeds hættir við að selja stuðningsmönnum félagið

Massimo Cellino, umdeildur eigandi enska B-deildarliðsins, Leeds, hefur dregið til baka loforð sitt um að selja meirihluta í félaginu til eignarhaldsfélagsins Leeds Fans United.

Eins og nafnið gefur til kynna standa stuðningsmenn Leeds að baki eignarhaldsfélaginu en þeir eru ósáttir við hversu slæm staða félagsins er og vilja koma Cellino frá.

Sjá einnig: Samþykkir að selja stuðningsmönnum meirihluta í Leeds

Í gær greindi félagið frá því að vonir stæðu til að Cellino væri reiðubúinn að selja hlut sinn í félaginu á 30 milljónir punda, jafnvirði tæpra sex milljarða króna. En í dag sendi það frá sér yfirlýsingu þar sem fram kemur að Cellino sé hættur við allt saman.

Stuðningsmannafélagið hvatti í gær ástralska leikarann Russell Crowe til að leggja sitt af mörkum í kaupunum en Crowe hefur áður sýnt því áhuga að eignast hlut í Leeds.

Sjá einnig: Crowe fær ekki að kaupa Leeds