Rösler rekinn frá Leeds og fyrrverandi stjóri Kára tekur við

Enska B-deildarliðið Leeds United er búið að reka Uwe Rösler, knattspyrnustjóra liðsins. Steve Evans, fyrrverandi stjóri Rotherham tekur við Leeds en hann stýrir sinni fyrstu æfingu í dag.

Forráðamenn Leeds gáfust upp á Rösler eftir 2-1 tap gegn Brighton á heimavelli um helgina, en liðið er í 18. sæti deildarinnar eftir ellefu umferðir og hefur aðeins unnið tvo leiki.

Ítalinn Massimo Cellino, eigandi Leeds, hefur ekki mikla þolinmæði, en Rösler var fimmti stjóri liðsins á einu ári þegar hann tók við starfinu í maí. Evans verður sá sjötti á síðustu 17 mánuðum.

Neil Redfearn, Darko Milanic, Neil Hockaday og Brian McDermott eru allir búnir að fá stígvélið frá Cellino síðan hann tók formlega við í apríl 2014.

Steve Evans gerði góða hluti með Rotherham, en hann kom liðinu úr D-deildinni í B-deildina á tveimur árum með Kára Árnason sem einn af lykilmönnum liðsins. Það hélt svo sæti sínu í næst efstu deild sem nýliði á síðustu leiktíð.

Evans yfirgaf Rotherham í september en ástæða fyrir brotthvarfi hans var aldrei gefin.