Samþykkir að selja stuðningsmönnum meirihluta í Leeds

Hópur stuðningsmanna Leeds er að gerast meirihlutaeigandi í félaginu eftir að eigandinn Massimo Cellino samþykkti að selja meirihluta hlutabréfa sinna.

Cellino hefur staðið í ströngu utan vallar þar sem að hann hefur í tvígang verið dæmdur fyrir skattsvik á Ítalíu. Eigendur knattspyrnufélaga í Englandi verða að standast kröfur um heiðarleika og löghlýðni og því var Cellino dæmdur í bann, sem hann hefur nú áfrýjað.

Þess fyrir utan hefur Leeds átt slæmu gengi að fagna og Cellino hefur verið með sex knattspyrnustjóra hjá félaginu á aðeins tveimur árum. Hann hefur áður sagt að hann ætli sér að byggja félagið upp en viðurkennir nú að hann gæti þurft að sleppa tökunum.

Sjá einnig: Eigandi Leeds féll á eigendaprófinu

„Það er 100 prósent öruggt að ég mun selja stuðningsmönnunum,“ sagði Cellino. „Ef þeir vilja kaupa félagið og hugsa um það. Stuðningsmennirnir eru eina almennilega eign félagsins.“

„Ég er leiður og ég skammast mín. Draumur minn var að gera mitt besta en ég hef ekkert áorkað og fjölskyldan er ekki einu sinni hjá mér.“

„Ég er að reyna að verja félagið en að sama skapi hef ég gert mig berskjaldaðann. Niðurstaðan er að stuðningsmennirnir segja að það sé tímabært að ég fari.“

Sjá einnig: Neitar því að leikmenn fóru í verkfall