19 ára skotinn til bana af lögreglu

Lögregluþjónn skaut hinn 19 ára Tony Robbinson til bana í gærkvöldi. Yfirmaður lögreglunnar í Madison í Bandaríkjunum sagði að skoti hefði verið hleypt af eftir átök á milli Robbinson og lögregluþjóns, en ekki liggur fyrir hvort hann hafi verið vopnaður eða ekki.

Hópur fólks kom saman við staðinn þar sem Robbinson var skotinn í gær og kölluðu þau: „Svört líf skipta máli“, eða „Black lives matter“.

Samkvæmt AP fréttaveitunni fékk lögreglan tilkynningu um að maður væri að stökkva fyrir umferð og að hann hefði gengið í skrokk á öðrum. Lögregluþjónninn bankaði á dyrnar á íbúð sem grunur lék á að maðurinn væri í, en segist hafa brotið sér leið inn eftir að hafa heyrt hljóð úr íbúðinni.

Þá segir lögreglan að maðurinn hafi ráðist á lögregluþjóninn sem hleypti af fleiri en einu skoti. Robbinson lést af sárum sínum á sjúkrahúsi.

Borgarstjóri Madison sagði þetta vera sorglegt atvik og benti á að vegna laga, þurfa utanaðkomandi aðilar að rannsaka slík mál. Því getur lögreglan ekki veitt miklar upplýsingar um rannsóknina, né atvikið.

Hann bað fólk um að sýna stillingu og leyfi rannsókn að fara fram. Mikil reiði hefur verið í Bandaríkjunum undanfarna mánuði vegna fjölda atvika þar sem lögregluþjónar hafa skotið unga svarta menn til bana.