Arnar ekki sammála marklínutækninni: „Mér finnst þetta vera mark“

Marklínutæknin sannaði einu sinni sem oftar gildi sitt þegar Chelsea tapaði gegn West Ham, 2-1, í ensku úrvalsdeildinni á laugardaginn.

Kurt Zouma, varnarmaður Chelsea, skallaði boltann að marki West Ham og virtist hann vera kominn allur inn fyrir línuna en marklínutæknin var því ekki sammála.

Þegar myndir úr henni voru skoðaðar kom í ljós að 95 prósent boltans var fyrir innan línuna en það er ekki nóg samkvæmt reglunum.

„Mér finnst þetta vera mark. Ég byggi það einfaldlega á því að allur snertiflötur knattarins er fyrir innan. Knötturinn er hnöttóttur. Hann er ekki flatur,“ sagði Arnar Gunnlaugsson, sérfræðingur Messunnar, í gærkvöldi.

„Er hversu marklínutæknin hefur reynst vel og truflar leikinn lítið ekki reynst gjörsigur fyrir þá sem vildu hana í leikinn?“ spurði Hjörvar Hafliðason og Þorvaldur Örlygsson svaraði:

„Jú, algjörlega. Við þurfum ekkert að rífast um þetta. Þetta er tækni sem við bara treystum á. Computer says no,“ sagði Þorvaldur.

Alla umræðuna má sjá í spilaranum hér að ofan.