Kynnir minnihlutastjórn með Græningjum eftir viku

Stefan Löfven, formaður sænskra jafnaðarmanna, mun halda áfram ríkisstjórnarmyndun sinni og gerir ráð fyrir að kynna nýja ríkisstjórn á föstudaginn eftir viku. Löfven greindi frá þessu eftir fund sinn með forseta þingsins fyrr í dag.

Þingforsetinn Per Westerberg sagðist ánægður með fund sinn með Löfven sem greindi honum frá framgöngu mála við myndun ríkisstjórnar og fjárlagagerð. „Ég treysti skoðun Stefans og tel að hann geti kynnt tillögu að fjárlögum sem njóti meiri stuðnings en tillaga Bandalagsins [bandalag borgaralegu flokkanna],“ sagði Westerberg.

Í frétt SVT kemur fram að líkt og búist var við munu jafnaðarmenn mynda minnihlutastjórn með Græningjum og er reiknað með að ríkisstjórnin verði kynnt eftir viku. „Þetta verður góð lausn,“ sagði Löfven, sem gaf þó ekkert upp um samsetningu komandi ríkisstjórnar.

Löfven segist sannfærður um að geta kynnt tillögu að fjárlögum sem verði samþykkt í þinginu.

Jonas Sjöstedt, formaður Vinstriflokksins, segist reiðubúinn að semja um innihald fjárlagafrumvarpsins, þannig að þingmenn flokksins geti greitt atkvæði með frumvarpinu.